GADTB Güney Azərbaycan Demokratik Türk Birliyi
GADTB: BMT-nin İranda insan hüquqları üzrə xüsusi məruzəçisi May Sato öz mandatının başlamasından iki il keçməsi ilə əlaqədar İranda ölüm hökmlərinin icrasına tamamilə xitam verilənədək edamların dayandırılması üçün qanuni moratorium tətbiq edilməsinin zəruriliyini vurğulayıb.
O bildirib ki, sabahdan etibarən, oktyabrın 10-da qeyd olunan Ümumdünya Ölüm Cəzasına Qarşı Mübarizə Gününədək, İran İslam Respublikası rəsmiləri ilə müzakirəyə çıxardığı ölüm cəzası ilə bağlı işlər barədə hər gün məlumat verəcək. Bu işlərin əksəriyyəti edam təhlükəsi ilə üzləşən şəxslərlə bağlıdır.
May Satonun “X” sosial şəbəkəsində paylaşdığı açıqlamada deyilir: “İranda insan hüquqları üzrə xüsusi məruzəçi kimi mandatımı üzərimə götürdüyümdən iki il ötür.
İlk gündən etibarən İranda ölüm cəzasının tətbiqini yaxından izləyirəm. Bu gün ölüm cəzası tamamilə ləğv edilənədək edamların icrasına qanuni moratorium tətbiq edilməsinə əvvəlkindən daha çox ehtiyac duyulur.
Sabahdan oktyabrın 10-da Ümumdünya Ölüm Cəzasına Qarşı Mübarizə Gününədək İran İslam Respublikası rəsmiləri ilə müzakirəyə çıxardığım ölüm cəzası ilə bağlı işlər barədə hər gün məlumat verəcəyəm.
Bu işlər əsasən edam təhlükəsi ilə üzləşən şəxslərlə bağlıdır. Onların bir çoxu beynəlxalq ədalətli məhkəmə standartlarından ciddi şəkildə uzaq olan proseslərdən sonra ölüm cəzasına məhkum edilib.
Onların arasında etirazlarla əlaqədar saxlanılan şəxslər, narkotiklərlə əlaqəli cinayətlərdə təqsirli bilinərək məhkum edilənlər və qisas cəzasına (qisas) məhkum olunan şəxslər də var.”
