GADTB Güney Azərbaycan Demokratik Türk Birliyi
GADTB: Beynəlxalq Jurnalistlər Federasiyası (IFJ) İran rejimi parlamentinin xarici və guya «düşmən» hesab olunan KİV-lərlə əlaqəni cinayət saymağı nəzərdə tutan yeni qanun layihəsini kəskin şəkildə pisləyib. Federasiya xəbərdarlıq edib ki, bu layihənin qəbul edilərək tətbiq olunması ifadə azadlığını daha da məhdudlaşdıracaq, İran cəmiyyətini daha da təcrid edəcək və insanların məlumat əldə etmək hüququnu pozacaq.
Beynəlxalq Jurnalistlər Federasiyasının baş katibi Entoni Blanjer bu layihəni ifadə azadlığının daha da məhdudlaşdırılmasına və informasiya dövriyyəsinə nəzarətin gücləndirilməsinə yönəlmiş addım kimi qiymətləndirib. O bildirib ki, beynəlxalq KİV-lərlə əlaqələrin məhdudlaşdırılması İran xalqının səsinin daha da boğulmasına gətirib çıxaracaq.
Blanjer İran rejiminin rəsmilərini bu qanun layihəsindən imtina etməyə, jurnalistləri və onların məlumat mənbələrini qorxutmaq siyasətinə son qoymağa çağırıb.
IFJ-nin məlumatına görə, qanun layihəsinin parlamentdə müzakirəsi hələ başa çatmayıb və onun müddəaları sonrakı müzakirələr zamanı dəyişdirilə bilər.
Layihənin parlament tərəfindən qəbul edilməsindən sonra mətn İran rejiminin Konstitusiyaya Nəzarət Şurasına göndəriləcək. Bu qurum layihəni təsdiqlədiyi halda, ifadə azadlığına və vətəndaşların xarici KİV-lərlə əlaqələrinə qarşı daha geniş məhdudiyyətlərin tətbiqi üçün hüquqi zəmin yaranacaq.
