GADTB Güney Azərbaycan Demokratik Türk Birliyi
GADTB: Birləşmiş Millətlər Təşkilatının Baş katibi Antonio Quttereş sentyabrın 16-da, BMT Baş Assambleyasının başlamasından əvvəl Nyu-Yorkda keçirdiyi mətbuat konfransında bildirib ki, Hörmüz, Babülməndəb boğazlarında və onların ətrafındakı sularda gəmiçilik azadlığı beynəlxalq hüquqa uyğun olaraq tam təmin edilməli və bütün tərəflər buna hörmət etməlidir.
O, həmçinin husilərin Səudiyyə Ərəbistanındakı mülki infrastruktura hücumlarını və Babülməndəbdə azad gəmiçiliyə maneələr yaratmasını pisləyib. Quttereş bildirib ki, BMT-nin xüsusi nümayəndələri bu gərginliklərin aradan qaldırılması istiqamətində geniş səylər göstərirlər.
BMT Baş katibi husilərin Babülməndəb istiqamətində irəliləməsi ilə bağlı danışarkən bu bölgədə gəmiçilik azadlığının “nəyin bahasına olursa-olsun” təmin edilməli olduğunu vurğulayıb.
Davam edən hərbi əməliyyatlara toxunan Quttereş bildirib ki, Yəməndəki müharibə təcrübəsi bu böhran üçün hərbi yolla həllə nail olmağın olduqca çətin olduğunu göstərir. O əlavə edib: “Hərbi əməliyyatlar davam edir, lakin bu, təkbaşına problemi həll etməyəcək.”
Quttereş ciddi danışıqlara başlanmasının vacibliyini vurğulayıb və tərəfləri Yaxın Şərqdə qarşıdurmanın daha da kəskinləşməsinə son qoymaq üçün dialoqa başlamağa çağırıb.
