گادتب: سنتیابرین (سپتامبر) 11ی دونیا تاریخینده اؤنملی گوندورسه آذربایجان تاریخینده داها داها اؤنملی گوندور. چونکو 11سنتیابر(20 شهریور)، 1920(هجری 1299)، تبریزین ایندی منصور چارراهی آدلانان یئرینده، شیخ محمد خیابانی قتله یئتیریلدی و اوندان بیر آز اوزاقدا، تبریزین سیرخاب محللهسینده پروفسور حمید نطقی دونیایا گؤز آچدی. نطقینین دوغوم گونو سیجیللیده شهریورین 22سی یازیلمیش آما شهریورین 20سی اونون دقیق دوغوم گونودور و نطقی ایللر سونراسی بو حادیثهنی بئله سؤیلهمیشدی:
«سنین گؤزلرین یومولاندا من
گؤزلریمی آچدیم:
هر یان دوماندی، سیسدی، توستویدو،
یانقین کولـلری هله ده ایستییدی.
شهریمدن
بوتون ماوی قوشلار اوچموشدو.
لاکین سن، رؤیالاریمی خیالینلا دولدوردون،
گؤزومده نور،
دیزیمده زور،
اورهییمده قورور اولدون.»
بیر گون سونراسی انقلابچی معلم و ژورنالیست تقی رفعتین ده جسدی یول قیراغیندا تاپیلدی. او ایران و آذربایجاندا یئنی شعرین لیدری و دموکراتلارین قزئتینین باشیازاری ایدی. حمیدین آتاسی دوکتور حسن نطقی ده تجدد قزئتینده رفعتـین یولداشی و قلمداشی ایدی. تقی رفعت بونلاردان علاوه آذربایجانین تایسیز شاعیری حبیب ساهیرین ده معلمی اولوب اونون گؤزونو شعر دونیاسینا آچمیشدی و اونبئش ایل سونرا رفعتین شاگیردی اولان حبیب ساهیر، حمید نطقینین معلمی اولوب آذربایجاندا سقراط، افلاطون، ارسطو اوچلویونه بنزر بیر زنجیر یاراتدی.
بو نئچه سطیرلیک یازیدا خیابانی، رفعت، ساهیر و نطقی حاققینی یئرینه یئتیرمک مومکون دئییل فقط بوگونون شهیدی خیابانینی حؤرمتله یاد ائدرک حمید نطقی حاقدا ایکی جوملهیه اکتفا ائدیریک. واختیکن دوکتور جواد هئیت، 21 یاشیندا آذربایجان قزئتینین باش مقالهلرینی یازان حمید نطقینین اؤیرنجیلیک ایللری حاقدا بئله یازمیشدی: «حمید نطقی او زامان دا بیر عالیم ایدی و بیزیم یاشدا اولانلارین بیلمهدیکلرینی بیلیردی، هم ده هامیدان چوخ اوخویاردی، کیتاب الیندن دوشمزدی.» و میرهدایت حصاری اونون حاققیندا دئییر:
سؤزو شهد ایدی، دیلی بال، سسی رؤیا کیمی خوش
روح وئرردی آداما پند حکیمانه ایله.