ادتاج اتحادیه دمکراتیک ترک آذربایجان جنوبی
گادتب: علی ایمانی قراملکی، اؤنجه‌لر «قاری‌ننه و قوشلار» و «جوتچو و حُقّه‌باز» آدلی ایکی اوشاق ناغیلی یاییملامیشدی و کئچن هفته «خوروزون ناغیلی» آدلی باشقا بیر کیتابی یاییملادی. علی ایمانی بو ناغیللاری کیتابلاردان یوخ، بلکه شفاهی دیللردن توپلاییر و بو ناغیلی دا، نووه‌دیلی آشیق علی کریمی‌نین دیلیندن یازیبدیر.
بو ناغیل خالقیمیزین ان قدیم ناغیللارینداندیر و ناغیلدا اود کشفیندن، مالدارلیق، اکینچیلیک و ریتوآللارین یارانماسینا اوزانان بیر سورج تصویر ائدیلمیشدیر. آما من بو کیتابی اوخویاندا مات قالدیم، چونکو بو ناغیل، اوتای آذربایجان دا «توتو» نشریاتی طرفیندن یاییملانمیش «چینقیدی چینقیدی بالاسرچه» ناغیلی ایله عینیدیر و فقط سرچه عوضینه خوروز واردیر. گؤره‌سن بونلارین هانسی اصیل روایتدیر؟
قدیم ناغیللارین بیرینده، خوروز باشیندا اولان پیپیکلری رنگ و فورم باخیمیندان اود شعله‌لرینه بنزدیب، کؤیشنده یاشایان حئیوانلارا «مندن اطاعت ائتمه‌سز، سیزی باشیمداکی اودلا یاندیراجاغام» دئییبدیر. هله خالق مَثَللرینده «خوروز یوخ ایدی سحر آچیلمیردی؟ خوروز یوخ ایدی گونش چیخمیردی؟» ایفاده‌لری، خوروزون گونش، سحر و اودلا ایلگی اولدوغونو گؤستریر. خوروز گونشین خبرچیسیدی و تاپماجالاردا خوروزون سحر بانی و آغزیندان فیشقیران سسی گونشین شعله‌سیدیر.
بونلاردان علاوه بیزیم طرفلرده عجیبه بیر عادت وار. اوزرلیک ییغان قادینلار، کند یاخینلیغیندا بیتن اوزرلیکلری ییغمازلار. اونلارا گؤره، خوروز سسی اوددور و خوروز سسی ائشیدن اوزرلیک یانار و بیر دفه یانان اوزرلیک داها اثر سالماز و کند یاخینلیغیندا بیتن اوزرلیکلره، خوروز سسی ائشیتدیکلرینه گؤره، اثرسیز اوزرلیک دئییرلر.
بو قونودا، خوروز لوغتی‌نه باخماق دا یارارلیدیر. چوخ احتیمال لوغتین کؤکو خور یا قوردور. قور، اود و آتش آنلامیندادیر و او کؤکدن قورغا، قووورما و قور آتئش کلمه‌لری هله ده ایشلکدیر. اوز، ایشیق و شعله آنلامیندادیر کی اونو اوغوز و اولدوز کیمی لوغتلرده گؤرمک اولور. یانی خوروز لوغتی، اود ایشیغی آنلامیندادیر.
بئله‌سه، اود کشفی ایله ایلگیلی اولان بو ناغیلین قهرمانی سرچه یوخ، خوروز اولمالیدیر و آشیق علی کریمی‌نین سؤیله‌دیگی ناغیل، خالقیمیزین قدیم دوشونجه‌سیله اویغون گؤرونور. بو کیتابلاری تبریزده، ارکین شرق طرفینده یئرلشن (طالقانی خیاوانی)، اختر یاییملاریندان آلابیلرسیز.
