ادتاج اتحادیه دمکراتیک ترک آذربایجان جنوبی
گادتب: فوآد بوزقورد «تورکلرین دیلی» عنوانلی کیتابینی بئله باشلاییر« :آسیا دوغورقان آنا کیمیدیر. کئچمیشین قارانلیق دؤورانلاریندان بَری سایسیز اولوسو باغریندا بؤیودوب و موختلیف تمدن‌لری باریندیریب‌دیر. بعضن اونون قوش اوچماز، کاروان کئچمز هوجرا بیر بوجاغیندا باشلایان لپه‌لنمه، یئر اوزونه داغیلار، توپلولوقلاری آلت- اوست ائدر. بیر باخیما دا، او، مرحَمتسیز بیر آنادیر و تورکلر، بو بلالی قطعه‌نین چیله‌کئش اوشاقلاری.»
هه، هه، هه. بو مرحمتسیز آنا، یالنیز دوغوب دونیانین دؤرد بوجاغینا سپمه‌یی بیلیب، اؤز بالالاری‌نین جانلی گونلرینه و جانسیز جسدلرینه صاحیب چیخماغی اؤیرنمه‌میش سانکی. آمریکادا یاتان بهزاد بهزادی، سیبئریا دا دونان حسین جاوید، اؤز تورپاغیندا یاتسا دا، هله مزاری گیزلین قالان معجز شبسترلی و بوگوندن بئله کانادا تورپاغیندا یاتان ریضا براهنی لای لای لای لای
تورپاغیمیزین آلتیندا نئفت، قاز، قیزیل، میس و باشقا قیمتلی عنصرلر واردیر، آما بیزجه بو تورپاغین اوستونده گزن اینسانلار اونلارین هامیسیندان داها قیمتلیدیرلر. فقط بیلمیرم ندنسه، قاراباغا قوربان گئدن او 2783 عسگر باسدیریلان گوندن بَری، تورپاغیمیزین آلتی اوستوندن قیمتلی گلیر و هرگون باشقا قیمتلی آداملار اونلارا قوناق گئدیر.
براهنی او قیمتلی‌لردن بیری ایدی و اورگیمیزین بوجاغیندا توز باسمیش او گیلئی اولماسایدی، بلکه ده ان قیمتلی‌سی ایدی. نه یازیق کی آنا تورپاقدا یاتماق نصیب اولمادی اونا و بو دا تورپاغینا صاحیب چیخماغی بارجارمامیش میللتلرین آلین یازیسی.
بونلار هامیسی بیر یانا، قولاق وئرین و یاخشیجا دینله‌یین دوسلار. یقین ایندی تبریزین نم هانسی خیاوانی‌نین آلتیندا ایتیب باتمیش قدیم قبریستاندان، ریضانین آناسی‌نین سسی گلیر؛ بو یالانلانمیش دیلده، اون یاشلی ریضا یالادیغی دیلده، غریب دوشن ریضام لای لای لای لای لای لای
