ادتاج اتحادیه دمکراتیک ترک آذربایجان جنوبی
گادتب-نین مطبوات مرکزینه داخیل اولان معلوماتا گؤره، 22 آوقوست ابوالفضل ائلچی بیین آنیم گونو ایله باغلی ایسوئچ آذربایجان فئدئراسیونو، باتی یؤتالاند آذربایجان ائوی بیرلیگی و ایستوکهولم آذربایجان ائوی باشقان‌لاری اورتاق بیلدیریشی یاییب‌لار.
بیلدیریشده دئییلیر
22 آوقوست، اولوسال اؤندر اؤلمز ابوالفضل ائلچی بیین آنیم گونو و ساوالانین زیارت گونودور. آذربایجان جمهوریتی‌نین دئموکراتیک سئچگی‌لر ایله سئچیلمیش ایلک جمهورباشقانی، آخج و باب کیمی اولوسال قوروم‌لارین قوروجوسو 22 آوقوست 2000-جی ایلده تورکیه‌ده وفات ائتمیش‌دیر.
ائلچیبی بیر آنلامدا اؤز یاشام یولونو تورک وارلیغینا، آذربایجانین موستقیللیگینه حصر ائتمیش‌دیر. او، 1975-جی ایلده سووئت محکمه‌سینده تورک میللت‌ی‌لیگینه، آنتی سووئت‌چیلییه و بوتؤو آذربایجان سئودا‌لی‌سی اولدوغونا گؤره حبسه گیرمیش‌دیر. سووئت حبسی بیر چوخ‌لارینی قورخودسا دا اونو داها دا میللیلشدیرمیش، داها دا عزمکار ائتمیش‌دیر. او، اؤز میللتی‌نین اؤنونده دورا‌راق میللی آزادلیق حرکاتینی ایره‌لی سورموش و سونوج اولا‌راق قوزئی آذربایجان موستقیل‌لیگی‌نین قازانماسیندا اونودولماز رول صاحبی اولموش‌دور. او، همین مباریزه اسناسیندا م.ا.رسول‌زاده‌نین قالدیردیغی دؤولت بایراغیمیزی باکینین آزادلیق مئیدانیندا بیرداها دالغالان‌دیرا‌راق (1989) یئنی‌دن یارانا‌جاق آذربایجان دؤولتی‌نین میللی بایراغی اعلان ائتمیش‌دیر.
ا.ائلچی بی قاراباغین و بوتونلوکله آزربایجانین باغیم‌سیزلیغینین تأمین اولونماسینی تبریزین فارسچی فاشیزمدن آزاد اولونماسینا باغلار ایکن چئشیدلی دانیشیقلاریندا بئله بیر فیکیر ایره‌لی سورموش‌دور کی، پارچا-پارچا اولان بیر فیلین گوجو اوفاجیق بیر سیچانا یئتمز! آذربایجان ایمپئریا اویون‌لارینا قوربان گئتمیش بؤیوک بیر میللی وارلیق‌دیر. بیز بو آلچاقلیق‌دان و بو پارام-پارچا اولماق‌دان قورتولمالیییق. آنجاق، او زامان‌دیر کی، گونئیین ده، قاراباغین دا، بورچالینین دا، دربندین ده اوزو گوله‌جک‌دیر.
وار اولان حاکمیت دایره‌لری طرفین‌دن ا. ائلچی به‌یه قارشی آتیلان داشلار نه قدر آغیر اولسا دا بو اینسانین نجیب‌لیگی و میللی اخلاق اولویلیگی قارشی‌سیندا ازیلیب دارما داغین اولموش‌دور. 10 میلیونلارجا گونئی آذربایجاندا، میلیونلارجا قوزئی آذربایجاندا، بیر او قدر ده تورکیه و تورک دونیاسیندا ائلچی بی سئوگی‌سی سورمکده، بؤیومکده و میللی ایدئولوگیا یا چئوریلمکده‌دیر. بو ایسه اونو گؤستریر کی، تورک میللتی اؤز سئویملی اوغلونو نه اینکی اونوتماییب، هم ده اونون توتدوغو یولو اؤزونون میللی باغیمسیزلیق یولونون یولبایی سئچمیش‌دیر.
سؤزسوز کی، ا. ائلچی بیین باغیمسیزلیق، اؤزگورلوک و بوتؤولوک ایستراتئگیاسی گنجلیگیمیزین اینسانلیغا گئدن یولونون ایشیغی‌دیر.
یولباییمیزین یولو گئدرلی اولسون!
یولو، دوشونجه‌سی تورک گنجلیگین اؤزگورلوک یولو اولسون!
میللت اوریینه گؤمموش ائلچی بی ایزی میللت یولونون ایشیغی اولسون!
باب باشقانی ائلچی بیین، قادین‌لار اوزره معاوینی و باتی یؤتالاند آذربایجان ائوی باشقانی آذر حیدر قیزی فروخی،
باب باشقانی ائلچی بیین گونئی آذربایجان اوزره معاوینی و ایسوئچ آذربایجان فئدئراسیونو باشقانی ائلدار قاراداغلی
ایستوکهولم آذربایجان ائوی بیرلیگی‌نین باشقانی سئودا صفرلی
