ادتاج اتحادیه دمکراتیک ترک آذربایجان جنوبی
گادتب: اولوسلار آراسی تئرروریست باشی یئنی بیر تئررور ماجراسی پئشینه دوشرکن، ایشغالا معروض قالمیش بیر باشقا اؤلکهده (عراق) اؤلدورولور. تورک و آذربایجان دوشمنی اولان فارسچی-شیعه رئژیمین ان تپهسینده یئرلشنلردن بیری کیمی اینسانلیغا قنیم کسیلن قاسیم سلیمانینین اؤلومو بیر چوخلارینین گیزلی اوزونو گؤسترمیش اولدو. سؤزسوز کی، قاسیم سلیمانی کیمی جانیلرین ده اؤز چاپینا گؤره آغلایانلاری و طرفدارلاری اولاجاقدیر. آنجاق، تورکیه و آذربایجان کیمی اؤزل اؤلکهلرده اؤزوندن، کیملیگیندن خبرسیزلره راستلاشیریق کی، جاهیلجهسینه دوشمهنین نشینه گؤز یاشی تؤکورلر. بو جاهیلجه داورانیشلارین مدافعهسینده اینانیلماز فاکتلار دا اوزه چیخیر. اؤزونو فیلان سیاسی، اجتماعی و مدافعه تشکیلاتینین لیدئری، اؤنجولو و یئتگیلیسی کیمی حاللاندیران کیمسهلرین تئرروریست باشینا قهرمان آدی وئرمهسی و تورک، آذربایجان، قاراباغ دوشمنی اولان ساختاکار مسلمان جمهوریتینه یالتاقجا باش ساغلیغی وئرمهسی بیر معنالی اولاراق سیاسی دله دوزلوقدور. بو اؤز کیملیگینه بیگانهلرین داورانیشلاریندا آیدینجا کؤلهلیک پسیخولوژی گؤرونمکدهدیر. اینسانلیق سوچوندان اینتئرپولون قارا لیستهسینده یئر آلان، یمنده، سوریادا، فیلیسطینده، افغانیستاندا، عراقدا، لبناندا و بیر چوخ آفریقا اؤلکهلرینده یوز مینلرجه سیویل و سوجسوز اینسانین جانینا قییان، ایران آدلانان یئرده بوتون باسیلان میللی، اجتماعی، صینفی آیاقلانمالاردا باش رولو اولان بیر جانی رئژیم پارچاسینا نئچه گؤز یاشی تؤکمک اولار!؟
ق. سلیمانی تئررورچو موللا رئژیمین بؤلگه سل پلانلارینی حیاتا کئچیرمک اوچون سینیرسیز گوجه مالیک اولان تئرروریست اوردو کوماندانی کیمی بو گونه دک قاراباغین ایشغالدا قالماسینا سیجاق باخان و هر زامان روسیا دؤولتی ایله کوآردیناسیادا اولان فارسچی رئژیم یئتگیلیسی اولموشدور. او جانی، هله ایکی آی بوندان اؤنجه ایران آدلانان یئرده حاقلی اعتراضچیلارا قارشی قورشون یاغدیرما امرینی وئرنلرین بیری اولموشدور. سلیمانینی میللی قهرمان آدینا لاییق گؤرنلر یاخشی اولار کی، اونون قتلی ایله باغلی عراقین بوتون شهرلرینده کوچه شنلیکلرینه باخاراق عبرت آلسینلار.
گادتب-یه گؤره، بو فاشیست رئژیمین بیر چوخ سلیمانیلری واردیر. بو رئژیم، سلیمانی کیمی جینایتکارلارین اوموزو اوستونده چیرکین حیاتینی سوردورمکدهدیر. بو جینایتکار رئژیمه اومید باغلاییب یالتاقلیق ائدنلر بیر دفعهلیک بو گئرچه یی بیلمهلیدیرلر کی، مینلرجه سلیمانیلر بسله میش فارسچی رئژیمدن اونلارا دوست اولماز! بو سویداشلار، گئج اولمادان میللتیمیزدن اوزر ایستمهلی، اؤزلرینی تمیزه چیخارمالیدیرلار. یوخسا، هئچ کسین حساب-کیتابی تاریخین حافیظهسیندن سیلینمهیهجکدیر.
گونئی آذربایجان دئموکراتیک تورک بیرلیگی (گادتب)
