اکبر آزاد: فارسجا ایله من

گادتب: 1339-جی ایلدن باشلانان اقتصادی- اجتماعی بُحرانلارین داوامی و تأثیری نتیجه سینده 1341-جی ایلده عایله ایله بیرلیکده تهرانا کؤچدوک. البته رحمتلیک آتام اوچ – دؤرد ایل اؤنجه آتام تک لیکده ایش اوچون طهرانا گلیب بیر مدت ایشله میشدیر. یعنی طهران لا تانیشلیغی وار ایدی. بیز کندیمیزدن اردبیله و اردبیلدن ده طهرانا گلدیکده، بیزدن اؤنجه طهرانا گلمیش بعضی قوهوم-اقربا و کندلیلریمیزین یانینا گئنتدیک. اونلار آرتیق آذربایجانلی تورک کندلی مهاجرلرین یئرلشدیگی محلّه، یعنی طهرانین بهجت آبادا محله سینده یاشاییردیلار. بو گون بهجت آباد محله سی ولیعصرخییاوانی(اسکی پهلوی خییاوانی)، کریمخان زندخییاوانی، مطهری خییاوانی(اسکی تخت طاووس خییاوانی) و اوستاد نجات الهی خییاوانی(اسکی ویلا خییاوانی)-نین محدوده سینده یئرلشیر. آدلارینی چکدیگیم خییاوانلارین آراسیندا بؤیوک بیر محوطه وار ایدی. بو محوطه نین بعضی قسمتلرینه یئنی سؤکولوب-تیکیلن بینالارین تؤکونتولرینی(نوخاله لرینی) بوشالدیردیلار. بیرحصه سینده تخمینن 1000 ائولی تورک عایله لری تیکیلیب یاشاییردیلار. آرالاریندا تک-توک فارس عاییله لری ده وار ایدی. باشقا بیر حصه سینده 70-80 ائرمنی عایله سی یاشاییردیلار و تقریبن اؤزل بیرمحله کیمی ساییلیردی. بیر چوخ یئرده ده هئچ بیر بینا یوخ ایدی.  بورادا ساکن اونلار ائو تیکمک اوچون یئر آلمازدیلار. بلکه مافیا کیمی بیر جریان، بیر مقدار پول آلیب بینا تیکیمه یه اجازه وئره ردی. ائو تیکنلر کرپیجلرین چوخونو چئوره یه تؤکولن تؤکونتولرین ایچیندن سئچیب توپلایاردیلار. تیکینتی ایشی نین ملزوماتینی حاضرلادیقدان سونرا، بیر گئجه ده 30-40 نفر دوست-تانیش، قوهوم-اقربا ال- اله وئریب، ائوی تیکیب قوُرتاریردلار؛ ائو یییه سینه کؤمک ائده ردیلر، گئجه ایله ائوی دؤشه ییب ایچینده اَیلَشسین. بو کیمی 30- 40 نفرین سایی چوخ ایدی. بعضن بیر گئجه ده 10-15 ائو تیکیله ردی.

بیز عایله 5-10 گون قوهوم- اقرابانین یانیندا قالدی. آتام بیر نئچه نفرین کؤمگی ایله ائو تیکمک اوچون لازم اولان مصالح و ملزوماتی حاضرلادی. بیر گئجه ده 500- 600 مئترمربع یئرین چئوره سینه حصار چکیب بیر طرفینده بؤیوک بیر اوتاق تیکدیلر. گئجه ایله کنددن گتیردیگیمیز کیلیم-پالازی؛ یورغان- دؤشه گی و قاب- قاجاغی تزه تیکیلن ائوه داشیییب ایچینده ایلشدیک. سحر چاغی بؤلگه نین پولیسلری(پاسبانلاری) گلدیکلری تیکیمیش بیر بینا ایله قارشیلاشدیلار. البته پاسبانلار یوخاریدا اشاره ائتدیگیم مافیا ایله سؤزلری بیر ایدی و دالدادا هوبوللَشیردیلر(راضیلیق و مُفاهمه لری وار ایدی). بونا خاطر چوخ مسئله یه ایلیشدیرمیردیلر. آیدین دیر آتام مافیا جریانیندان علاوه، یاواشجا بیر نئچه تومن ده پاسبانلارا قیسدیرمیشدی. بیز تقریبن محله نین اوجقاریندا تیکیلمیشدیک. بیزه یاخین اولان ائولرین اهالیسی عمومن تورک ایدیلر. سونرالار قونشولوغوموزدا بیر فارس عایله سی ده تیکیلدی. بیر گون منله قارداشیم قاپیمیزدا اویناییردیق، بیر اوشاق او ائودن، الینده بیر کاسا ائشیگه چیخیب بیزه یاخینلاشدی. کاسا یاوان دوگو(پولوو) ایله دولو ایدی. الی ایله کاسادان دوگونو گؤتوروب یئییردی.

بیز کندیمیزده اولان زامان، نودرتن دوگو پیشیریب یئیه ردیک. عینی حالدا عایله میز بوتون بؤلگه ده جریاندا اولان اینام اعتقادلار اساسیندا معتقد ایدی دوگو مقدس بیر محصول دور. حتّا دئیه ردیلر دوگونون اوزه رینه قرآن آیه سی«قل هوالله» یازیلیبدیر. بونا گؤره دوگویه چوخ سایغی و حؤرمتله یاناشاردیق! دنه سینی ده قویمازدیق یئره دوشه؛ دوشسه یدی گؤتوروب اؤپوب گؤزوموزه قویاردیق و….

الینده دوگو یئه ین اوغلان اوشاغی گؤردو بیز اونا باخیریق، فارسجا دئدی:

-پولو پخته(پوخ ته)است(پیشمیش دوگو دور)

بیز فارسی بیلمیردیک آنجاق سؤزوندن «پلوو» و «پوخ» سؤزجوکلرینی  بیر کوفر دانیشیق کیمی باشا دوشوب، اینام و اعتقادلاریمیز اساسیندا غضبلندیک. او نئجه دؤنه دئدیگی سؤزو تکرار ائتدی. او دئدیکجه بیز غضبلندیک آخر دا ایکی قارداش اونا دوغرو یئرییب کاسانی الیندن آلیب بیر یانا قویدوق و اونو شیرین دؤیوب آغلاتدیق. زیریلتییا دوشدن سونرا کاساسین اَلینه وئریب ائولرینه قایتاردیق و….

سونرالار بیزی باشا سالدیلار کی کوفر دئمه ییبدیر و بیز سهو باشا دوشموشوک و….