ادتاج اتحادیه دمکراتیک ترک آذربایجان جنوبی
گادتب: سون گون لرده دیکتاتوری ایران رئژیمینین سؤزده عدالتی یئرینه یئتیرمه قونوسوندا قاتیل لره و تورک میللی فعال لارینا وئردییی شاشیرتیجی جزالار ،خبرلرین باشیندا یئر آلیر.
دونیانی یؤنتمه ایددعاسی اولان جمهوری ایسلامی، اینسان حاقلارینی پوزماسیندا بیرینجی سیرلاردا یئر آلیر.
ایران جزا قانونو طرفیندن گونئی آزربایجانلی سیاسی فعال عباس بی لیسانی یا آجیماسیز ۱۵ ایل دوستاق جزاسی کسیلیب!
لیسانی بی نه آدام اؤلدوروب نه اوغورلوق ائدیب نه ده بیرینین حاققینی یئییب،ایران رئژیمینه گؤره عباس بی یین سوچو، تک باشینا بیر میللتین دوغال حاق لارینی قورماق، سسینی دونیایا چاتدیرماق و فارس دیکتاتورلوغونون قاباغیندا دیک دورماق دی، بودا توتالیتر حاکیم لرین خوشونا گئتمه ین بیر آددیم دیر.
نئچه آی اؤنجه ایران اطلاعات مامورو اولان ملیکانین نماینده سی سلمان خدادادی ،زهرا نویدپورا تجاووز و سونرا وحشی جه سینه اؤلدورولمه سوچوندان ساده جه ۲ ایل ایش دن اوزاقلاشدیرما جزاسینا چاتدیریلیر.
سون گونلرده آتاسینین الی ایله وحشی جه سینه اؤلدورولن ۱۵ یاشلی رومینا آدلی قیز اوشاغینین محکمه سی قورولوب و قاتیل آتایا ساده جه ۹ ایل حبس جزاسی وئریلیب.
ساده دیل له دئسک، ایران آدلانان یئرده ،بیر اینسانین جانین آلماغین جزاسی ۲ ایل سورگون لوک( اودا اگر دوغرودان اولورسا )بیر بؤیوک میللتین حاق لارینی قوروماق جزاسی ۱۵ ایل دوستاق دیر!
بئله بیر ایش عدالت و اینسانلیغین بیتیشی دیر، یئتر کی اونلارین ظالیم قورولوشلاری راحاتسیز اولماسین، اوندان سونرا هر نه ائدیلیرسه گؤز اؤرتوله بیلر ،ایستر اینسان قانی تؤکولسون،ایستر شهرلر داغیلسین ایستر میللتین خزانه سی چالینسین ،یالنیز ایران و ولایت فقیه قورولوشونا کیمسه توخونماسین.
عدالتیز باتسین.
