ادتاج اتحادیه دمکراتیک ترک آذربایجان جنوبی
گادتب: بو گونلر باشیمین شخصی و عائلهوی ایشلره چوخ قاتیشدیغیندان و واختیمین اولمادیغیندان «محمد بطحایی» آموزش و پرورش وزیرینین اصفهاندا مسئولیتسیز و نژادپرستانه و ایراندا فارس اولمایان دیللر علیهینه دانیشیغینا زامانیندا جاواب یازا بیلمه دیگیمدن راحاتسیزام!
آنجاق بو سویچو، شوونیستی و پانفارسیستی دانیشیقلار و افادهلره میلّتیمیز، مجلیس نماینده لری،امام جمعهلر، شهر شورالاری و مختلیف طبقهلر طرفیندن وئریلن جاوابلار و تپکیلری گؤردوکده اؤزومو بیر آز راحات حیسّ ائده بیلمهیه راضی سالیرام.
تاسّفلر اولسون آقای حسن روحانی جمهور باشقان اولدوقدان سونرا ان آزی ایران نفوسونون %40 تشکیل ائدن و اسلام حاکیمیتیندن سونرا 1000 ایل و آردی – آراسی کسیلمهدن بو اؤلکهنی اداره ائدیب بو مدّت ایچینده بوتون دیل و مدنیتلره حؤرمتله یاناشیب فارس دیلینده اثر یارادانلارا انعام وئرمکله تاریخده اؤزلریندن مثبت ایز بوراخان تورکلرین دیلینین بو زامان مکتب – مدرسهده دانیشیلیب – اوخونماسینی «خطرناک» آدلاندیران عیرقچی و پانفارسیسم تفکّورلو وزیر و معاونلرین دانیشیقلارینی رادیو- تلویزیون و مطبوعاتدان چوخ ائشیدیب – اوخویوروق!
آقای محمد بطحایی آموزش و پرورش وزیرینین اصفهاندا غیر فارس دیللرین علیهینه دانیشدیقلاری مسئولیتسیز سؤزلری،فارس دیلینی «زبان وحدت» یوخ، داها چوخ « زبان نیفرت»ه چئویره بیلر!
آموزش و پرورش وزیری آنا یاسانین 15 جی ماده سینین اجراسی و غیر فارس دیللرین اؤزللیکله ایراندا اکثریت اولوب اقلیت حقوقا مالیک اولا بیلمهین تورکلرین دیللرینین مکتب- مدرسه لرده تدریسی فیکیرینده اولماق یئرینه بئله نیفرت یارادان افادهلر سؤیلمهسی داها چوخ «خطرناک» و دوشوندوروجودور و بونو هر کس بیلمهلی و میلّتینین آلین یازیسینین نه اولاجاغینا فیکیرلشمه لیدیر!
