جمعه , مارس 29 2024
azfa

حسن راشدی: ادبیّات سمامیزدان باشقا بیر اولدوز آخدی؛« ناظر شرفحانه‌ای»میزده اوچوب گئتدی…!

گادتب: سه شنبه ۱۶ شهریور ۱۴۰۰ ساعات اون ایکی اولمامیشدی جیب تئلفونوم زنگ چالدی، کرجده یاشایان همیشه کی دوستوموزون آدی تئلفوندا گلدیکده سئوینه‌رک تئلفونا جاواب وئردیم.

آمما بو سئوینمک نئچه ثانیه‌دن چوخ چکمه‌دی، چونکو دوستوموز بیر آجی خبری منه چاتدیردی !

« اوستاد ناظر شرفخانه‌ای وفات ائتدی!»

نه زامان وفات ائتدیگینی سورشدوغومدا، «ائله ایندی …» دئمه‌یه  اکتفا ائتدی …!

آخ …! بئله بیر زاماندا و کورونا شرایطینده، وطن یولوندا چالیشان، وطن سئوگیسی ایله اوره‌یی چیرپینیب و وطن سئوداسی ایله یاشاییب- یارادان اینسانلاریمیزین وفاتی زامانی دفن و عزا مراسیمینده شرکت ائده بیلمه‌مه‌ییمیز، بیزه داها چوخ نیسگیل اولوب!

اوستاد « محمد رضا ملکپور »، « ناظر شرفخانه ای » تخلّصی ایله تانینمیش مهارتلی و اینجه دویغولو قوجامان شاعیریمیز ۱۳۱۷ هجری گونش ایلی اورمیه دریاچه‌سینین شرق طرفی «شرفخانه» شهرینده دونیایا گؤز آچمیش، ابتدایی تحصیلینی دوغولدوغو منطقه‌ده اوخویوب،  ۴ ایل تبریزده مقدماتی  و ۱۱ ایله یاخین قوم شهرینده سطح و خارج طلبه‌لیک درسیندن علاوه تهران بیلیم یوردوندا یوکسک لیسانس  مقطعینده تحصیل آلمیش و اوردان فارغ التحصیل اولموشدور و بیر نئچه ایل کرجین «اسلامی آزاد دانشگاه»یندا حقوق بؤلومونده تدریس ائتمیشدیر.

او، اوزون ایللر ایدی کرجده یاشاییر و ۵۸ جی نومره لی « ازدواج – طلاق» دفترخاناسینی اداره ائتدیکدن علاوه کرجین ادبی محفیل‌لرینده اشتراک ائدیردی.

اوستاد ناظر اوزون ایللر بویو دیلیمیز و ادبیاتیمیز یولوندا زحمت چکمیش و آنا دیلیمیزده اؤزوندن ۶ جیلد شعر، حیکایه  (اولدوزلو دَنیز، شئهلی سَحَر، ماهنی‌لی‌چای، «حیکایه‌لر،طنزلر و یئنی غزل‌لر»، اوره‌ک چیرپینتیسی و «تورکجه دیوان» ) اثرلرینی یادگار قویموشدور .

درین دویغولو و آذربایجانا باغلی اینسان،کرج محفلیمیزین آغ ساققالی و بَزَگی ایدی، ادبی مجلیسلریمیزده اولاندا، هر زامان اوندان « اورمو دریاچه‌سی» شعری‌نین اوخوماسینی تقاضا ائتدیکده، اؤزل بیر احساسلا اوخویاردی، یقین کی، اورمو دریاچه‌سی اونا دایاناقلی و چالیشقان ملّتی‌نین سیمگه‌سی ایدی:

«اورمو دریاچه‌سی! توفانلی دنیزلر باشی‌سان سن،

پارلایان تاج طبیعتده بیریلیان قاشی‌سان سن،

دوزلو، ایستَکلی، ماراقلی دره، داغ یولداشی‌سان سن،

دریالار سنگِ صبور اولسا، دَییرمان داشی‌سان سن،

سنی توفان ییخا بیلمَز؛

سنه هیچ کیم چیخا بیلمز؛

سنه یئل، سئل باتا بیلمَز؛

سنی کؤنلوم آتا بیلمز!

بیر عؤموردورکی، تقلّا و تلاطمله جوشورسان،

قایالار داغ کیمی دورسا قاباغیندا، دوروشورسان،

گئجه – گوندوز ووروشورسان….»!

اوستاد «ناظر» اقتدارلی ادیب و دویغولو شاعیر تورک، عرب و فارس ادبیاتینا مسلط ایدی ، آمما اونون آنا دیلینه باشقا بیر سئوگیسی واریدی، او تورکجه دیوانی‌نین مقدمه سینده یازیر :

«اون ایکی یاشیمدان شعر یازماغا باشلامیشام  آمما دوغروداندا بیلمیردیم کی، آنا دیلیم نه قَدَر گوجلو، گئنیش و نه قدر عنعنه‌لی‌دیر و بو آخیجی و آهنگین دیلین ادبی گؤزللیک‌لری‌ایله داها تانیش اولدوقجا  ایناندیم کی، بو دیل یالنیز اینسان دیلی یوخ، بلکه پری‌لر و مَلَک‌لر دیلی دیر…..!»

اوستاد «ناظر شرفخانه‌ای»نین وفاتی، ادبیات دونیامیزا بؤیوک ضایعه‌ اولدو، بو بؤیوک ضایعه‌نی او مرحومون یاخینلارینا و ادبیات سئورلریمیزه باش ساغلیغی وئریر و او بؤیوک اینسانا اولو تانری‌دان رحمت دیله‌ییرم.

دوباره امتحان کنید

حضور بانوان طرفدار تراختور در استادیوم

گادتب: به گزارش مرکز گادتب، برخی رسانه های هواداری تیم تراختور از صدور مجوز حضور …

«احد سیف‌خواه» با قرار وثیقه از زندان مرکزی تبریز آزاد شد

گادتب: به گزارش مرکز گادتب، «احد سیف‌خواه» برادر «آیاز سیف‌خواه» (فعال آزربایجانی که در بند …