ادتاج اتحادیه دمکراتیک ترک آذربایجان جنوبی
گادتب: ١٣٨۵- جی ایل خورداد قیامی هئچ زامان اونودولماییب و اونودولمایاجاق!
حق یولوندا و اهانت، تحقیر، توهین و ظولمه قارشی قیام ائدیب شهید اولانلاریمیزین روحو هر زامان بیزلری بو بئش گونلوک دونیادا اینسان کیمی یاشاماغا چاغیریر!
خورداد قیامی گونلریندن اون یئددی ایل کئچمه‌سینه رغما، پنجشنبه خوردادین دؤردونجو گونو (١٣٨۵) خیاو (مشکین‌شهر) شهرینده قیام زامانی، گول پارچاسی و آی کیمی پاریلدایان گؤزل و رعنا جاوانیمیز «جلیل عابدی»نین شهید اولدوغو دقیقه و صحنه‌سینی بیر دوست منه تئلفونلا خبر وئرنده دونیا باشیما ییخیلمیشدی…!
شهیدیمیزین باشیندان گولله ایله وورولدوغونو دئمیشدیلر!
آخ…!
تحقیر و توهینه اعتراضین جاوابی گولله اولمالیدیرمی؟!
آجی خبرلر باشقا شهرلردن گلیردی، اورمیه و سولدوزدان داها چوخ شهید خبرلری گلمیشدی….!
تبریز، اورمیه، زنجان، اردبیل، سولدوز، خیاو، قوشاچای، موغان، میانا، ماراغا و آذربایجانین کیچیک شهرلری بئله آیاغا قالخمیشدیلار.
تهران تورکلری‌ده خوردادین یئددینجی گونو بو راسیستی و ضد بشری اعتراضا قاتیلدیلار، آمما بو گونلر، اینسان حاقلاریندان دانیشان فارس دیللی باصطلاح روشنفکرلردن او زامان، بیر کلمه اولسون بئله «ایران» قزئته‌سینین تورکلره ائتدیگی توهینینه اعتراض ائدیب و آذربایجان قیامیندان سؤزده بئله حمایه ائدن اولمادی….!
آذربایجان و گئنل‌لیکله ایران تورکلری، اؤزلری اؤز حقلریندان دفاع ائتمه‌لیدیرلر، اؤزلرینی فارس آیدینلاری خطاب ائدنلرین چوخو مع الاسف پان فارسیسم،راسیسم و گئریلیک رؤیالاریندا یاشاییرلار و اونلاردان تورکلره و غیر فارس ملیت‌لره یاردیم گؤزله‌مک یئرسیزدیر ..!
١٣٨۵ جی ایل، خورداد قیامی هئچ زامان اونودولماییب و اونودولمایاجاق…!
حسن راشدی
