ادتاج اتحادیه دمکراتیک ترک آذربایجان جنوبی
گادتب: آذربایجان تورک میللتی پهلویلرین اینگیلتره واسطهسیله حاکمیتی غصب ائتمهسیندن بو گونه دک داوام ائدن ایشغال، آسیمیلیاسییا و ایرقچی سیاستینه معروض قالماقدادیر. گونئی آذربایجاندا آذربایجان تورک میللتی بوتون طبیعی حاقلاریندان محروم ائدیلیب، تاریخی، مدنیتی و دیلی دانیلیب و بو گون ده بیزی بیر میللت اولاراق یوخ ائتمه سیاستینی کسکین شکیلده داوام ائتدیریرلر. لاکین گونئی آذربایجاندا تورک میللتی بو ایشغال و اسارتله باریشماییب، اؤزونون آزادلیغی و موستقیللیگی اوغروندا مباریزهسینه داوام ائدیب. ۱۹۴۵-جی ایلده آذربایجانین بیر حیسهسینده اؤز دؤولتینی برپا ائده بیلدی. بو دفعه ایسه شرق و غرب بلوکونون بیرباشا و یا دولایی یاردیمی ایله یئنه ایرقچی فارسلار گونئی آذربایجانی ایشغال ائتدیلر. اونلار آذربایجانین بؤیوک تورک میللتینی فاشیستجهسینه کیچیک قوم کیمی گؤسترمهیه چالیشیب، اؤلکهمیزی تالان ائدرک، بوتون یئرآلتی و یئر اوستو میللی سرمایهلرینی فارس بؤلگهلرینه داشیییرلار.
عینی زاماندا بوتون مئدیا ایمکانلاریندان فایدالاناراق چالیشمیشلار کی، میللتیمیزی جاهیل، گئریچی و… گؤستریب، دیل و کولتوروموزه قارشی آغیر تحقیر ائدیجی وئریلیش و فیلملر حاضرلاسینلار.
۲۰۰۶-جی ایلده ایرقچی و ایشغالچی فارس دؤولتینین رسمی اورقانی اولان «ایران» قزئتینده تحقیر ائدیجی بیر کاریکاتور ایله ان چیرکین و غیری-اینسانی شکلیده میللتیمیزی تحقیر ائدیب و حقیقی ایرقچی و فاشیست صیفتلرینی گؤسترهرک میللی وارلیغیمیزین نئجه یوخ ائتمک استراتئگییاسینی یایینلادیلار. بو ایرنج و تحقیر اوصولو ایله آذربایجانلی اوشاقلارین بئیینلرینی یوماق سیاستی آرتیق میللتیمیزین صبیر کاساسینی داشیردی.
میلیونلارجا آذربایجان تورکو کوچهلره آخیشاراق، «هارای-هارای من تورکم!» دئییب، اؤز وارلیغینا صاحب چیخدیب، ایشغالچی فارس رئژیمین آپاردیغی اینکار و آسیمیلیاسیون سیاستینی بوشا چیخاردیلار.
بیر خرداد قیامیندا میللتیمیز ایشغالچیلیق، ایرقچیلیک و موستملکهچیلییه قارشی عصیان قالدیریب، گؤستردی کی، کیمسه اونون منلیینی تاپدالاییب، تحقیر ائده بیلمز. مینلرله آذربایجان تورکو یاخالانسا دا، اونلارجا شهید وئرهن، یوزلرله اینسانی یارالانان خالقیمیز بیر داها دونیایا گؤستردی کی، آذربایجان تورک میللتی اؤز موستقللیگی اوغروندا موباریزهسینی داوام ائتدیرمکدهدیر.
گونئی آذربایجانین ۱ خرداد قیامی آذربایجان تاریخینده قیزیل بیر صحیفه آچدی. آرتیق بو قیام موستقیللیک اوغروندا موباریزهمیزین مهم بیر مرحلهسی کیمی خاطیرلانیر. بو گون ایران آدلانان یئرده باش وئرهن قیتلیق، سفالت، اینفیلیاسییا و قیمت آرتیمی اهالینی موللا رئژیمینه قارشی اعترضلارا باشلاماغا وادار ائدیر. آرتیق آذربایجان تورک میللتینین یولو معلومدور و «آزادلیق، عدالت، میللی حکومت» شعاری ایله اؤز موستقیللیگی اوغروندا موباریزهیه داوام ائدیر. گونئی آذربایجان دئموکراتیک تورک بیرلیگی (گادتب) ۱ خرداد قیامینین شهیدلرینین یولونو صداقتله داوام ائدیب، گونئی آذربایجاندا میللتیمیزین موباریزهسینی دستکله ییر. اینانیریق کی، آذربایجان تورک میللتینین شرفلی موباریزهسی گونئی آذربایجانی موستقیللییه و آزادلیغا قوووشدوراجاق.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
