ادتاج اتحادیه دمکراتیک ترک آذربایجان جنوبی
گادتب: سن دئییرسن بو اؤلکه‌ده من تکم
من دئییرم آللاهیمیزدیر حَکَم
سنکی بئله یاپیشیبسان دیلیندن
نه اولوب‌کی من دیلیمدن ال چَکَم
مئهر(خزل) آیی‌نین بیرینجی گۆنلری اؤلکه‌ده یاشایان بیر چوخ آداما سئوینج آیی اولسا دا چوخلارینا اؤلوم آیی کیمی‌دیر.
ـ بیر سیرا کیف ـ پالتار، باشماق و یازی‌ـ‌پوزو وساییلی ساتانلارا برکت آیی اولسا دا، کؤتله‌نین بیر چوخو مادّی سیخینتی‌لاردان آسیلی، بو آیی سئومزلر.
آنجاق مادّی سیخینتی‌لاردان قیراق عدالتسیز و نابرابرجه‌سینه ساواشین باشلانماسی داها دا سیخیجی گلیر.
یۆزمین‌لرجه غئیر‌ـ‌ی فارس اوشاغین دهشت و شاشقینلیق گۆنو دئمکدیر.
بو نحس گۆنده ائوده، ائلده، کۆچه‌ده دانیشیلان دیل قیراغا قویولوب یاساق اولور، همن تانیش سؤزجوکلر تانینمامیش دون گئیینه‌رک اؤزگه سانیلیب، اوخولا گئدن سوچسوز اوشاقلارین گله‌جکلری‌نین تمل داشلاری‌نین اَیری شکیلده فورمالاشدیریلیر.
اینسان آنا قارنیندا اولارکن بئله ائشیگین سسلرینی ائشیدیب، یالانلارلا بۆرونموش دۆنیایا آیاق قویمادان اؤنجه قولاقلاری بو سؤزجکلری ائشیده‌رک دوغولاندان سونرا، هر هانسی دیلین اؤیره‌نمه‌سینده یاردیمچی اولور.
آنجاق بیلیمسل و کیلیشه‌ای بحثلردن قیراق، اوخولا گئدن اوشاقلار یاشادیقلاری چئوره‌ایله ایلگی‌لری‌ایله باغلانتی‌لارینی قیریلمیش دورومدا گؤررکن اوخول و اؤیره‌تیم سیستئمدن آجیقلاری گلمه‌یه باشلاییر و یئنی دیل مواهبینده آلدیقلاری تحقیرلرله آلچالمالار بو خوشلانماماق دویغوسونو داها دا گۆجلندیریر. [ اوخول‌لاردان قاچیش، یاری یولدا بوراخیلمیش اؤیره‌تیم و…. بئله سیستئم‌لرین سونوجلاریندان ساییلار ]
ـ آنجاق بۆتون بحثلر اؤیره‌نجی‌لر و اوشاقلاردان گئتدیگی حالدا، غئیر‌ـ‌ی فارس اؤیره‌تمن‌لرده ده بو چتین‌لیک‌لرله توققوشورلار
اؤز دیل‌لرینی قیراغا قویوب اؤزگه بیر دیل‌له اؤز دیلداشلاری‌نین بوغازلارینا باشقا دیلی تپمک چوخ دا راحات دییل و هر آلنی آچیق و اؤزگور روحلو اؤیره‌تمنی اینجیدیر.
بوندان قیراق اؤز آماجلارینی باشقا دیلده چاتدیرماق اۆچون ده زورلوق چکه‌رک، لاپ دوغروسو غئیر‌ـ‌ی فارس اؤیره‌تمن‌لر، اؤیره‌نجی‌لردن بتر، اوخوللارین باغلی قالماغیندان سئوینیرلر، و واختیندان تئز تقاعود(بازنیشسته‌لیگی) سئویرلر.
هر حال شؤونیستی دۆشونجه‌لر و فرهنگیستان قوللوغوندا اولوب اونون بویوروغویلا آددیم آتان اؤیره‌تیم و ائییتیم باخانلیغی‌نین دورومو بوندان دا یاخشی اولماز.
و بوگۆن تۆرک، عرب، بلوچ، لور و… اوشاقلارین ائشیتسیز بیر یاریشا گیرمک گۆنو اولماقلا بیرگه اینسانییتین چیرکین دۆشونجه‌لر و فاشیست قایناقلی قویولارین دیبینده بوغولوب، گؤمولن گۆنو دئمکدیر.
بو گۆنو قوتلاماق یئره، آنا دیلده درس آلا بیلمه‌ین اوشاقلارلا بیرلیکده بؤیوک خالقیمیزا باش ساغلیغی وئریب، گله‌جه‌یه اومودلا باخیریق.
