ادتاج اتحادیه دمکراتیک ترک آذربایجان جنوبی
گادتب: اؤیره نجی اولدوغوم ایللر، رحمتلیک صمدسرداری نیانین “تبریز شهر اولین ها” کیتابینی برک سئویب، چوخ یئرلرین ازبرلمه میشدیم بئله.
باشقا ائتنیکی تانیشلارلا هر دارتیشمادا، او کیتابدان اؤرنکلر گتیره رک؛ اؤز یۆکسک کۆلتوروموزو و قاباقجیل اویغارلیغیمیزی گؤزه چکمک ایسته ییردیم.
ایللر سونرا، بو ایشیمه باشقا آچی لاردان باخدیغیمدا اؤزومو قیناماغا باشلادیم
تبریزده بیرینجی کیتاب ائوی، بیرینجی بلدیه، بیرینجی گۆنده لیک، ایلک باسین ائوی(چاپخانا) و… بلکه ایلک باشدا سئویندیریجی، غرورگتیریجی اولسونلار آنجاق داها دا اینجه باخیشلا باخدیغیمدا، نه یین غرورو؟
هانسی اؤلکه ده، کیملره قارشی، بیرینجی لیک و ایلک تمل داشی قورماق.
بئله بیر باشلی ـ باشین ساخلاسین اؤلکه ده، بیر ایشین ایلک یارادانی اولسان نه فرق ائده جک، کوپی ائدیب اؤز آدینا ووران اولسان نه فرقی؟
ائله او اۆزدن او گۆنلردن بیر یئنی تصمیم توتدوم
بو اؤلکه نین ایشلری ایله ایشیم اولماسین
اونلار بیزیم دیلیمیزه اؤنم وئرمه ییب اؤیره نیلمه سی اۆچون اوخول لار آچدیرماییرلار، بیز اؤزوموز اؤز آنادیلیمیزین قایدا ـ قوراللارینی اؤیره نیب اؤیره دک.
اونلار سازیمیزی، موسیقی آلت لریمیزی تئلویزیونلاریندا گیزله دیب یایینا چیخارتماییرلار، بیز ده اونلارین تئلویزیونلارینا باخماییریق[ ذاتا قونشو و قارداش اؤلکه لریمیزین وئریلیش لری، دیلده وطنداش و میللی آدلانان تی. وی دن بیزه داها چوخ میللی و یاخیندیر ].
اونلار شنلیک تؤره نلری بهانه سینه اورمو و باشقا شهرلریمیزده بؤلوجو قوروهلارین قوندارما و لاپ دوغروسو باشقا میللت لردن اوغرولادیقلاری رقص لری تصویره چکیب، بیزیم رقصیمیزی سانسور ائده جکلرسه ده، هئچ بیز او تی. وی لری رسمییته تانیماییریق.
چوخ یئرلر و قونولاردا رسمیته تانیمادیغیمیز کیمی.
ویلیام والاس [ ایسکاتلندین ایلکین اؤزگۆرلۆک ساواشلاری نین لیدئریلریندن ] بئله بیر سؤز دئییب؛ اؤزونوز گئده بیلمه یه دیگینیز یئره، باشقالاری نین گئدیب ـ گئتمه مه یینه قرار وئرمه یین
او اۆزدن من ده علیخانی آدلی آدامین کوپی پئیست وئریلیشینی تحریم ائتمه ییرم، چۆن ذاتا بوگۆنه دک بیر بؤلومونو ده ایزله مه میشم، آنجاق تحریم ائتمه مه ییمین اساس نه دنی ایسه، بو اؤلکه نین مئدیلاری لا، تی. وی کاناللارینی نین چوخدان کؤکلو ـ دیبلی اولاراق داشلارینی آتماغیمداندیر و احتیاجیمیز دا یوخدور؛ اونلار بیزیم موسیقیمیزی، رقصیمیزی، کۆلتوروموزو قوروسونلار، بو میللت اؤزو، اؤز گۆجونه دایاناراق، ان آغیر دورومدا اؤز مدنی وارلیقلارینی قورویا بیلیب ایندی دیجیتال و ایلیشکی لر دؤورینده، یئنی دؤور[عصرجدید] آدلی وئریلیشده بیزیم رقصیمیز سانسور ائدیلسه نه اولاجاق، یاییملانسایدی نه اولاجاقدی؟
ذاتا اؤزوموز رقصلریمیزی تانیییب هر آن ایزله یه بیلیریک دۆنیا شؤهرتلی آذربایجان رقصی نین ایزله مک کئیفیندن باشقا ائتنیکلر اؤگسۆز(محروم) قالدیلار.
بیز اؤزوموز ـ اؤزوموزله واریق، وارلیقلاریمیزی دا اؤزوموز قوروماغا قادیریک
بو وارلیقلاری قوروماق یولوندا جان وئرمه یه ده جۆمله حاضیریک.
