ادتاج اتحادیه دمکراتیک ترک آذربایجان جنوبی
گادتب-نین مطبوعات مرکزینه داخیل اولان معلوماتا گؤره، آوسترالییا آذربایجان آسوسیاسییاسینین پرئزیدئنتی، گونئی آذربایجان دئموکراتیک تورک بیرلیگی (گادتب) بئین الخالق علاقه‌لر دئپارتامئنتینین صدری سایین میکائیل بی اویتا و گادتب قادین و اینسان حاقلاری دئپارتامئنتینین صدری سایین سیما خانیم آذرسون آوسترالییادا تورکیه جمهوریتینین ۱۰۰ ایللیگی موناسیبتیله کئچیریلن کونسئرت تدبیرینه رسمی دعوتله قاتیلیبلار.
تدبیر اوکتیابرین ۲۱-ده آوسترالییانین سیدنئی شهرین‌ده کئچیریلیب.
تئدبیره همچینین آوسترالییانین یئنی گونئی اوئلز (NSW) ایالتینین مولتیکولتورالیزم ناظیرلیگینین تئمثیل‌چی‌سی سایین عمر اینجه کارا و ایکی میللت وکیلی و چوخ سایدا دیگر شخصلر قاتیلمیش‌دیلار.
سایین میکائیل بی اویتا و سیما خانیم آذرسونون ایشتیراکی ایله باغلی تدبیرده همچینین آذربایجان ماهنی‌سی سسله نیب و تورکیه بایراغی ایله یاناشی آذربایجان بایراغی قالدیریلمیش‌دیر.
تدبیرده آذربایجان و تورکیه همرأی‌لیگی و بیرلیگی بیر داها نوماییش ائتدیریلدی.
تدبیردن شکیللری تقدیم ائدیریک:
