ادتاج اتحادیه دمکراتیک ترک آذربایجان جنوبی
گادتب: بیلدییینیز کیمی غئیردموکراتیک، توپلوما سؤیکنمه ین و توپلومو، خالقی تمثیل ائتمه ین حاکیمییت، کوتله و توپلوم اینسانلاری دئییل اؤز ایدولوگیا و چیخارلاری اوغروندا ایره لیله ییب و یالنیز اؤز قوروم لارینین ایستک لرینی دوغرولتماغا جان آتیرلار. بو مساله یوکسک سوییه ده اولان سانترالیستی سیستئم لرده داهادا قاباریق شکیلده اورتایا چیخیر و مرکز، مرکزچی لر و اورداکی سیاسی قورومون چیخاری و ایدولوگیاسی اوغروندا سیاست لر یورودولورلر.
بئله بیر سیستئم لر توپلومدان اولوشمادیغی اوچون توپلومادا یانیت وئرمک مجبورییه تینده اولمورلار.
بوگونلر ساوالانین اته یینده هئچ بیر اقتصادی یاراری اولمایان یول چکمه پروژه سی باشلانیب دیر. بو پروژه اکوسیستئمی و یابان حیاتینی تهلوکه آلتینا آپاریب و بیر نئچه حئیوانین آرادان گئتمه و نسلینین کسیلمه سینه ندن اولوب و یاخود اونلارین یوخ اولمالارینی هیزلاندیریب دیر.
بئله اولدوقدا بیرسیرا چئوره چیلر و دوغاسئورلرین نیگارانچیلیغی داهادا آرتیب. اردبیل- موغان یولوندا هر آی اینسانلارین آجیناجاقلی اؤلومونه شاهید اولوروق، نییه بو یولو ائنلندیریریب و دوزلتمیرلر؟ آلت یاپیلار، آنا یول، دمیریولو، الکتریک مرکزلری، ساغلاملیق، بیلیم، اونیوئرسیته، آراشدیرما، کولتور، اینجه صنعت، ایدمان، توریزم، فابریکا، صنایع، ایش یئرلری، ایلنجه مرکزلری، سیویل توپلوم لاردان، مدنی تشکل لردن یوخسون اولان و اقتصادی اینکیشافدا هر زامان ۲۰ دن آرتیق ایالتدن سونرا آدی گئدن بیر ایالتین، سانکی بوتون سورون لاری چؤزولوب بیر تکجه او یولون دوزلدیلمه سی قالیر او اوزدن بؤیوک بیر جیددییتله بوگونکو اقتصادی فلاکتده، ایشسیزلیکده و باهالیق دا او پروژه یه بودجه آییریب و اونو اویقولاییرلار.
بیز هر زامان اینسان و چئوره آراسیندا اولان دنگه نین قورونماسینی ایسته یه رک آذربایجان و ساوالان دوغاسینین هانسیسا مقام لارین منفعت لری اساسیندا و غئیر علمی شکیلده اویقولانیب داغیدیلماسینا قارشی ییق و ان مدنی یوللارلا اؤز دوغامیزی اینسانلاریمیز کیمی قورویاجاییق، نییه کی بو ایشلرین چئوره میزه، اکوسیستئمیمیزه و اینسانلاریمیزا داها چوخ ضررلی اولدوغونا امینیک.
