جمعه , مارس 29 2024
azfa

عباس لسانی: گونئی آذربایجان ۲۰ ینجی عصیرده؛ یارارلار و یارالار

گادتب: بیر مانیفست(مرام نامه) اورتایا قویدو ،۱۲ ماده‌لیک مرامنامه‌ده ایرانین توپراق بوتونلوگون قوروماقلا گونئی آذربایجان تورک اولوسونون ایچ اؤزگورلوگو و اؤزون یؤنتمک حاققی اؤن گؤرولموشدو.

آذربایجانین کوتله وآیدینلارین اؤزونه آرخا گؤره‌ن “فیرقه” سونوندا ۱۳۲۴ آذرآینین ۲۱ده بؤیوک جوشقو ایله میللی حؤکومتی اعلان ائتدی.

پیشه‌وری باشچیلیغی ایله قورولان میللی دؤولت اولکه‌ده گووه نلیک(امنییت) و توخداقلیق (ارامیش) ساغلاماغی باشاردی،دوغما حؤکومت ایقتیصادی و ایجتماعی چتینلیکلری آرادان قالدیرماغا  گئجه_گونوز چالیشیردی و بؤیوک باشاریلار ألده ائتمیشدی.

اولایلاری حساسییتله ایزله‌ین تهران سینیرلنسه ده “عصبانی اولسادا” تپگی “عکس العمل” وئره بیلجک دورومدا دئیلدی.

اینگیلیس و یئنی اورتایا چیخان سوپر گوجون “آمئریکا” تام ائتگیسی آلتدا اولان و آرد_آردا دئولت دَیشیکلیگیله سارسیلان تهران،تجروبه لی و پارادوکسیکال “متناقض” کیشیلیک “شخصیت” داشییان بیر سیاست چینین”قوام” دئولت باشینا کئچمسی ایلن توپارلاندی.

باشباخان اولان”قوام”ساغ  ایله سول آراسیندا ده نگه قورماق آماجی ایلن شوروی یانلی “طرف داری” سیاستچی لری کابینه‌سینده یئر وئردی.

باتینین اؤزللیکله اینگیلیسین سؤزچوسو کیمی مسکویا گئدن قوام،بیر اَلده باتینین آتم بومباسینین تهدیدی بیر اَلده‌ده قورئی نفتینین ایمتیازی ایله ایستالینله دانیشیغا اوتوردو،بئینینده باشقا دوشونجه‌لر بئجرده‌ن ایستالین،بیر سیرا ندن‌لره گؤره دانیشیق ماساسینا اوتورمادان گونئی آذربایجان میلی حرکتین باتی ایله اؤز آراسیندا دوزلیشمه پایی “وجه المصالحه” ائتمک سونوجونا وارمیشدی.

۱_  پیشه وری ده،درین میلی روح و خالقینا سونسوز سئودانی آنلامیشدی.

۲_ پیشه وری نین،سولچولوغو آذربایجان اولوسونون قورتولوشونا آراج “وسیله” ائتدیگینه قوشقوسو قالمامیشدی.

۳_  پیشه‌وری و گونئی آذربایجان میللی حرکتینده اولان گوجلو میللی دوشونجه نین شوروی نین سینیرلاری ایچینده اسیردوشموش تورک میللتلرینه سیچرایاجاغیندان درین قورخویا دوشموشدو

بئله لیکله دونیا زحمتچکنلرینین بیرلشدیرمه شوعارین وئرن یؤنَتیم،آذربایجان اولوسونون قوتسال دبریشین ایدئولوژیک “سولچولوق ، یا دوغرو دئسک روس ائمپریاسینین چیخارلاری” دئیل بلکه بیر میللی دوشونجه داشییان حرکت گؤرونجه،بوتون شوعارلارین اونوتدو.

گونئی قیامین چوخ اوجوز ساتان،داها دوغروسو،آذربایجان اولوسوندان قورتولماغا چالیشان ایستالین،بیر نئچه  اؤنمسیز ایمتیاز قارشیلیغیندا گونئی آذربایجان سورونون ایرانین ایچ سورونو تانیدی.

بیلملییک کی مغرور ایستالین آرادیغین پیشه وری ده بولسایدی بو پرستیژ داواسین هئچ دَیَره اوتوزمازدی.

بو آرا دوغما حؤکومته یییه لنن آذربایجان میللتی دونیا اویونلارینا قوربان گئتدیگیندن خبرسیز اؤلکه‌ده بیر ایلدن آز بیر زاماندا اون ایللرین گلیشمه سین (پیشرفتین) ساغلامیشدی.

قوام تهرانا دؤندو و بیر پارا دیپلماسی ایله میللی حرکتین لیدرلرین جایدیرماغا باشلادی.

آمئریکالی ژنرال “نورمن ایسکارتزکپوف” ایران اوردوسون توپارلامیشدی.

باتینین آغیر و گلیشمیش یاراقلاری ایلن(سیلاحلاری ایلن) قورشانان ایران اوردوسو،سیلاح آنبارلاری قیزیل اوردو طرفیندن بوشالمیش گونئی آذربایجان اوردوسو درین اینام و ائلینه باغلی  اولاراق بؤیوک و تاریخی بیر دؤووش سرگییه قویدو.

سونوندا اوچ گون قانلی دیرنیشدن سونرا گوجلو اوردو و آمئریکانین ساواش اوچاقلارینین قاباغیندا آج و موهوماتسیز قوشونون دورماغی،اولان ایش دئییلدی.

ایران اوردوسو آذربایجاندا ایره‌لیله یه‌رک عسکر،قارایاخا،اوشاق و قادینا باخمایاراق قیرقین آپاریردی و دونیا سوییه سینده بئله،کیمسه بو سوی قیریما دور دئمیردی!

اون مینلر اینسان شهید و سایسیز یارالی،سورگون،ایتگین و توتساق ( دونیا سوییه سینده اَن اوزون سیاسال توتساق چکن بؤیوک قاهرامان رحمتلیک “صفرخان قهرمانیان” بونا تانیقدیر ) وئرن گونئی آذربایجان بؤیوک بیر سوی قیریمینا اوغرامیشدی.

سونوندا۲۱/آذر/۱۳۲۴ ده قورولان گونئی آذربایجان میللی حؤکومتی۲۱/آذر/۱۳۲۵ ده دئوریلدی و بیر میللتین اؤزگورلوک سسی قان گؤلونده بوغولدو. بؤیوک اؤندر سید جعفر_پیشه‌وری میللتینین آراسیندا قالیب اؤلمگه قرار وئرسه ده،ایستالینین ترفندی ایله قوزئی آذربایجانا آپاریلیب و ماشین تصادیفی گؤستریلن اولایدا بیر ائرمنی اَلیله شهادته یئتیشدی.

بئله لیکله ۲۱/آذر/۱۳۲۵ ده گونئی آذربایجان میللی حرکتی سویوق ساواشین ایلک قوربانلیغی اولدو.

سوی قیریمینا اوغرایان گونئی آذربایجان میللی حرکتی اوزون بیر سوره(مدت) یئرآلتینا چکیلدی و کولون آلتیندا کوًز اولدو.

گؤنئی آذربایجان‌دا کیتاب یاندیرماق جینایتی

دوغما حؤکومت ییخیلدیقدان ۵ گون سونرا ۲۶/آذر/۱۳۲۵ده،آذربایجان شهیدلرینین قانی قورومامیش یئنی بیر شؤلن باشلاندی،قاتیللر یئنی بیر قیرغینا اَل ووردولار،اونلار نه تکجه بیرایل بویوندا باسیلمیش،آذربایجان تورکجه سینده اولان درسلیک کیتابلاری،بلکه ائولرده و کیتابلیقلاردا کی اَل یازما کیتابلارادا آجیماییب اوست اوسته قالایاراق یاندیردیلار.

پهلوی رژیمی بو ایره‌نج داورانیشی ایله ساسانلی لارین اوزون آغ ائتدی.

او گون دونیانین گؤزو اؤنونده بیر میللتین کئچمیشی و کیملیگی یاندیریلدی،آنجاق هئچ بیر دؤولت،اؤرگوت و یا اولوسلار آراسی قورلوشدان اعتراض سسی چیخمادی،بو تایسیز جینایته دونیا گؤزون یومسادا دوغما اوره‌کلر او آلاولارلا یانیب یاخیلدی.

نئجه کی قوزئی آذربایجانین دیرنیش شاعیری بؤیوک صمد وورغون،بو آجی اولایی گوجلو دویغولاری ایله دونیا سوییه سینه داشیدی،او ۱۹۵۲ ده،پاریس‌ده قورولان دونیاسال باریش قورولتاییندا (کنگره صلح جهانی پاریس_۱۹۵۲)” یاندیریلان کیتابلار”آدلی بیر منظومه ایله یاتمیش ویجدانلاری دیکسیندیردی.

بؤیوک شاعیر شعرینین بیر پارچاسیندا بئله سؤیله‌ییر :

جللاد!

سنین قالاق قالاق یاندیردیغین کیتابـــلار

مین کمالین شؤهرتیدیر،

مین اوره یین آرزیسی بیز کؤچریک بو دونیادان،

اونلار قالار یادگار هر ورقه نقش اولونموش نئچه اینسان دویغوسو مین کمالین شؤهرتیدیر،

مین اوره یین آرزیسی یاندیردیغین او کیتابلار آلاولانیر،یاخشی بـاخ!

او آلاولار شؤعله چکیب شفق سالیــر ظولمتــه

شاعیرلرین نجیب روحو مزاریندان قــالخـاراق

آلقیش دئییرعشقی بؤیوک،بیر قاهرامان میللتـه

او آلاولارشؤعله چکیب شفق سالیــر ظولمته

بئله لیکله سوی قیریمی (Genocide) ایلن گونئی آذربایجان اولوسونا ساغالماز یارالار ووران حاکیمییت او جینایتلری یئترلی گؤرمه یینجه،کولتورل قیریم (Cultural Genocide) ایلن بیر اولوسو یئر اوزونده ن سیلمگه چالیشدی.

آنجاق دونیا آلیش وئریشلرینه قوربان گئتدیینی گؤرن گونئی آذربایجان اولوسو و آیدینلاری،بوتون یئللرین ترسینه أسدیینی گؤرونجه سوسماق زوروندا قالدی.

اورتامی (فضانی) اویغون و مئیدانی بوش گؤرن ایکینجی پهلوی رژیمی باتینین(غربین) دیکته ائتدیگی سیاستی ایرلی آپارماقدا ایدی،ییخیلمیش میللی حؤکومتی خالقین گؤزوندن سالماق ایچین اَلیندن گلنی أسیرگه میردی و گرچکلری یوزدورماغا (تحریف ائتمه یه) باشلامیشدی.

دیکتاتور آتاسینین یولون دوام ائدن “محمد ریضا”،اؤز بقاسی و بریتانیانین بؤلگه‌ده آپاردیغی سؤمورگه (ایستیثمار) سیاستینین قارانتی سیندان اؤترو ایران میلتلری اؤزللیکله ایرانین اَن آکتیو و سیاسی دوشونجه داشییان،آذربایجان تورک اولوسونو،اَریتمک (آسیمیله) ایچین یئنی و داها یوخ ائیدیجی یؤنتملر (روشلر) اویقولاییردی (اجرا ائدیردی)،او آتاسینین ترسینه زوراکیلیق و گؤرونن سیاستلرله دئییل،بلکه سورونگن بیر یؤنتمله میللتلری ایچدن چوروتمگه اَل ووردو.

قیزیل آخینا قارشیت؛یاشیل قورشاق

شووونیستی دوشونجه ایله یؤنه تیلن اؤلکه ده میلی دوشونجه لر بوغولدوقدان سونرا، کوتله و آیدینلار آرا ایستیبداد ایلن قاباخلاشماغا ایدئولوژیک دوشونجه لر(سولچولوق و ایسلامچیلیق) دیرچلمه یه باشلادی.

میللی حرکتلری،سینیرلاری دیشیندا اولسا بئله،اؤز چیخارینا اویغون گؤرمه یه ن کرملین،ایران خالقلاری آراسیندا دین عونصورونون سیخ و درینلیگینی گؤزه آلاراق ریسگه اَل ووردو و ماتریالیستی دوشونجه نی یایماغا داها آرتیق اؤنم وئردی.

سویوق ساواشین اَن قیزغین بؤلگه لریندن اولان اورتادوغو.

ایکی سوپرگوجون اؤلوم_قالیم آلانینا(مئیدانینا) چئوریلدی،یئری گلدیکده گوج،یئریگلدیکده ایدئولوژی قوللانان ساوئتلربیرلیگی باتینی سیخیشدیرمیشدی و گونئیه دوغرو ایستی سولارا ساری ایرلیله مکده ایدی.

بو آرا آجونون(دونیانین) او بیری دنگه سی(بالانسی)” آمئریکا بیرلشمیش دؤولتلری” یئنی بیر تاکتیک،یا داها دوغروسو بیر پروژه ایله بو جیبهه ده رقیبینی دوردورابیلدی.

آمئریکا دمیر ایله دمیری کسدی،ایدئولوژی قارشیتیندا ایدئولوژی. سونرالار سیاست اوزمانلاری(پولوتولوقلار) بوپروژه یه “قیزیل آخینا قارشیت یاشیل قورشاق” آدینی وئردیلر.

افغانیستاندا مجاهیدلر(طالیبان) ایله قیزیل اوردونو دوردوردو،ایراندا ایسه ۱۳۴۲ ده تملی قویولان ایسلامی نهضتی اؤز چیخارلارینا اویغون گؤرونجه (داها گوجلو دوشمنه قارشی) بیر دئوریمله (اینقیلابلا) سونوجلانماسینا گؤز یومدو.

دوباره امتحان کنید

بازی کودکانه سرویس‌های اطلاعاتی رژیم ایران علیه حرکت ملی آزربایجان

گادتب: به گزارش مرکز گادتب به نقل از برخی سایتهای آذربایجان جنوبی،  گروه تروریستی حسینیون …

تحصن اهالی روستای زرشوران تکاب مقابل معدن طلای زرشوران

گادتب: اهالی روستای زرشوران شهرستان تکاب(تیکان تپه) آزربایجان روز سه شنبه ۷ فروردین ۱۴۰۳ در …

دیدگاهتان را بنویسید