ادتاج اتحادیه دمکراتیک ترک آذربایجان جنوبی
گادتب: “تاریخ بویو بؤیوک خاقانلیقلاری اؤز بئشییینده بویا-باشا چاتدیران اؤلکهمیز، سون یوز ایللیکلرده بؤیوک یئنیلگیلره اوغرادی. گولوستانلا تورکمنچایدا اؤلکهمیز پارچالاندی. اؤلکهمیزین پارچالانماسینا سیاستچیلرله قوشون باشچیلاری قول چکدیلر. آنجاق ایش بوردا بیتمهدی. بو آجیماز یارا ایندینین ایندیسی ده سارسیدیر بیزی. بیز هئچ زامان بو آیریلیغا اینانا بیلمهدیک. قوشون ساواشچیلاری ساواشدان گئری چکیلمیشلرسه ده، بیز گئری چکیله بیلمهدیک. دئمک سیاستچیلر باریشدی، آنجاق میللتیمیز باریشا بیلمهدی.
اودلو سیلاحلار سوسان دورومدا، قانلی قیلینجلار اؤز قینلاریندا یاتان دورومدا، قلملر ساواشدی، دیللر دؤیوشدو. بئلهلیکله پارچالانمیش اؤلکهنی بیرلشدیرمک اوغروندا یئنی ساواش دوشرگهسی یاراندی؛ کولتورل ساواش دوشرگهسی. بو ساواشین ساواشچیلاری شاعیرلریمیز اولدو. بیزیم زنگین میتولوژیمیز بیزه یول گؤستردی. بیز بیلیردیک سؤز، قیلینجدان کسَرلیدیر. بیز بیلیردیک قازانخان کیمی آسلان ایگیتلریمیزین قیلینجلاری باشارا بیلمهدییی ایشلری، دده قورقودون قوپوزو باشاریردی.
بئلهلیکله بو ساواشین آلینیازیسینی شاعیرلریمیزله یازیچیلاریمیزا تاپشیردیق. اونلار دا بو یولدا هئچ ایشدن اسیرگهمهدیلر. وطن اوغروندا جان وئرمکدن ده قورخمادیلار. بختیار وهابزاده «گولوستان» پوئماسینی یاراتدی، سهند ایسه پهلویلرین قارا دوستاقلاریندا «آراز» پوئماسینی. داها آراز بیزیم تاریخسل باخیشیمیزدا سادهجه بیر چای دئییلدی. آراز آیریلیق سیمگهسینه دؤنموشدو. آراز بیزیم سیرداشیمیز اولموشدو”(1). هئچ کیمسهیه آچیقلاییب دئیه بیلمهدیییمیز سؤزلری آرازا دئییردیک:
آرازی آییردیلار
قان ایله دویودولار
من سندن آیریلمازدیم
ظولم ایله آییردیلار
قایناق: شهریارلا بیرلیکده اؤزگهلشمکدن اؤزلشمهیه دوغرو، محمد رحمانیفر، ایکینجی باسقی، ص 107
