ادتاج اتحادیه دمکراتیک ترک آذربایجان جنوبی
گادتب: کوراوغلو تاماشاسینین نوماییشه چیخماسیندان دی آیینین بیرینجی هفته‌سینده خبردار اولدوم. نوماییشین تکی تبریزده صحنه‌یه بوراخیلماسین ائشیدرکن چوخ اوزولدوم. نئچه گون سونرا اونیورسیته کلاس‌لاری‌نین حضوری اولماسیندان خبر وئردی‌لر. همن گون‌لر نوماییشین ایجرا تاریخی‌نین دییشیلمه‌سی، اونیورسیته کلاس‌لاریلا عینی زامانا راستلاشماغینا، سبب اولدو. تحصیل آلدیغیم اونیورسیته‌نین تبریزه یاخین اولماسی، کئچیجی اولسا بئله اوره‌ییم‌ده بویوک سئوینجه نه‌دن اولدو. بلیط آلارکن گؤزوم نوماییشین ساعاتینا ساتاشدی؛ گئجه ساعات ۲۰:۳۰. نوماییشه باخماق اوچون یاتاق‌خانادان نئجه گئتمک اولاردی. بیرینجی ترم قیز یاتاق‌خانالاری‌نین گیریشینه گئیت قوشاراق اؤیرنجی‌لردن بارماق ایزی آلیب، گیریش سیستم‌لرینه یوکله‌‌میش‌دیرلر.بئله‌لیک‌له قیزلارین گیریش-چیخیش ساعات‌لاری بئله ثبت اولونماغا باشلانیلمیش‌دیر. یئنه ده دیققت‌چکیجی مقام بو محدودیت‌لرین تکی قادین‌لارا حیاتا کئچیریلمه‌سی ایدی. اونیورسیته‌نین بئلنچی قادین‌لارا قارشی آیری‌سئچکی داورانیشی قیز اؤیرنجی‌لری‌نین بیر سیراسینین اعتیراضینا سبب اولدو؛ اونیورسیته مسئول‌لاری همن اعتیراض‌لاری بئله جاواب‌‌لامیش‌دیرلار: «گئیت‌لرین قوشولماسینا چوخلو هزینه اولموشدور، بونلارین هامیسی قیزلارین اوزلرینه خاطیردیر. اونلاری خطرلردن قوروماق اوچوندور.»
یئنه ده «قوروماق»، «امنیت»،«اؤزلرینه خاطیردیر»و س. سؤزلری آلتیندا حاق‌لاریمیزین تاپدالانماسینا شاهید اولموشدوم. مادام کی باشقالاری بیزلرین یاخشی-پیسیمیزی تعیین ائده‌جک‌لر بو فلاکت‌لرین بیتمه‌مه‌سینه شاهید اولاجاییق.
بئله‌لیک‌له نئچه گون اونیورسیته‌ده اولارکن کوراوغلو نوماییشینه حسرت‌له اینستاگرامدا نوماییشه گئدن اینسان‌لارین پایلاشدیغی جانلی یایین، استوری و شکیل‌لری ایله داغینیق باخما ایمکانیم اولدو.
