گادتب: کئچن ایل بو زامان لار ایدی، گونلری سایا-سایا هیجانا بورونموشدوم.
اوچ ایلدن سونرا سئوگیلیمه قوووشاجاقدیم، آیریلیق لار سونا چاتیردی، منیمسه بوتون دیلک لریم، آرزولاریم جانلانمیشدی، یئنی بیر یاشام، یئنیدن سئوگی دولو حیاتا، یئنی باخیشلارا و یئنی دونیالارا حاضیرلانیردیم.
آرتیق بوتون آجی لاری گئریده بوراخاجاقدیم، منه توشلانان اوزوجو باخیش لار یوخ اولاجاقدی، آرتیق اؤزومده بوغولمایاجاقدیم و رومانین سون یارپاغینا واراجاقدیق. سئوینج دویقولاریم قانادلاناجاقدی و من موتلولوغو تامسیناجاقدیم.
آنجاق بیرآندا هر شئی دییشیلدی، قوووشما زامانی یئتدیکده، گؤروشمه ییمیز بیر آی داهادا اوزادیلدی و سونرا ایسه سئوگیلیمله داها اوزاقلاردا سورگونلوکده گؤروشمه لی اولدوم.
سورگون حیاتینیدا یاشادیم، نه اولدوغونودا آنلادیم.
سئوگیلیمله برابر اولدوغومون سئوینجینی، آنامدان، عاییلمدن، دوغما دیلیمدن و وطنیمدن آیری قالماق آجیسی اوسته له ییردی. سورگونلوک گونلریم بیر ایل سورسه ده، اوچ ایل آیریلیق گونلری قدر تام بیر آغیر اولدو.
ایندیسه سورگونلوک بیتمک اوزره و من دوغمالارا، وطنه قاییتماق سئوینجیله جوشوب داشدیغیمدا، یئنی خیال لار قوردوغومدا اوزوجو بیر خبر یئتیشدی، سئوگیلیم بیر ایل یئنیدن زندانا گئده جک ایمیش. یئنه آیریلیق گؤرونمه یه باشلادی، یئنه اوزاقلیق لار و یالقیزلیق مئیدان اوخودو.
بلکه ده آیریلیق لار وجودومون بیر پارچاسی ایمیش بلکه ده آلین یازیم آیریلیغا بولاشیب..
اولو تانریم من نییه بوتون سئودیکلریمی بیر آرادا گؤره بیلمیرم؟ اونلاری بیر یئرده توتا بیلمیرم؟ ندن حیات بیزه بوقدر آجیماسیزدیر؟ نییه قیسمتیمیزه آجی آنلار سریلیب؟
آنجاق بوتون اؤزلم لر، یالقیزلیق لار، سنلی-سنسیز گونلر، سئوگی، گؤزللیک، سورگون، غربت و دویونجا باسدیردیغیم آرزولار بیر یانا، وطن سئوگیسی بیر یانا.
وطنه گؤره آجی چکمک گرکمیش…