ادتاج اتحادیه دمکراتیک ترک آذربایجان جنوبی
گادتب-نین مطبوعات مرکزینه داخیل اولان معلوماتا گؤره، گونئی آزربایجان دئموکراتیک تورک بیرلیگی (گادتب) باشقانی سایین اژدر بی تاغیزاده مظفر آذربایجان اوردوسونون لاچینه داخیل اولماسی و بو بؤلگهنین ائرمنی ایشغالیندان آزاد اولونماسی مناسیبت ایله آذربایجان پرئزیدئنتی، آذربایجان تورک میللتی و دونیا تورکلرینی تبریک ائدیب.
سایین اژدر بیین تبریک مئساژینین بیر حیسهسینده بیلدیریلیر کی، عالی باش کوماندانین قطعیتی و شانلی آذربایجان اوردوسونون خصوصی ایگیدلیک گؤسترمهسیله ایشغالچی ائرمنیستان تسلیم اولماغا مجبور قالدی. نتیجهده 30 ایل ائرمنی ایشغالیندا اولان لاچین رایونو و شهری آرتیق بو گون آزاد ائدیلدی و مظفر آذربایجان اوردوسو همین آذربایجان اراضیلرینی نظارتی آلتینا آلدی. آزربایجانین ایستراتئژی بؤلگهلرینین آددیم-آددیم آزاد ائدیلمهسی میللتیمیزه روح بوتؤولوگو گتیرمکله او تایلی- بو تایلی بوتون آذربایجانلیلاری سئویندیریر. بو اوغور تورک دونیاسینا دا بؤیوک تحفهدیر.
گادتب وطنیمیز آزربایجانین بو غلبهسینی سئوینجله قارشیلاییب، بو مناسیبتله آذربایجان پرئزیدئنتی، آذربایجان تورک میللتی و تورک دونیاسینی تبریک ائدیریک.
یاشاسین آذربایجان اوردوسو!
قاراباغ آذربایجاندیر!
اژدر تاغیزاده
گونئی آزرباجان دئموکراتیک تورک بیرلیگی (گادتب) باشقانی
