ادتاج اتحادیه دمکراتیک ترک آذربایجان جنوبی
گادتب: آذربایجان خالق جمهوریتینین قوروجولارین‌دان اولان، بؤیوک تورک‌چو، دؤولت و اجتماعی خادیم، سیاست‌چی و پوبلیسیست، آذربایجان تورک میللتینین داهی اؤندری محمد امین رسولزاده ۱۸۸۴-جو ایل یانوارین ۳۱-ده باکینین نووخانی کندین‌ده آنادان اولموش‌دور. بو ایل محمد امین رسولزاده نین ۱۴۰ ایللیک یوبلئیی‌دیر. آذربایجان پرئزیدئنتی جناب ایلهام علیئو محمد امین رسولزاده نین یوبلئیینین کئچیریلمه‌سی باره‌ده سرا‌نجام ایمضالامیش‌دیر. سرا‌نجاما اساساً آذربایجان‌دا گئنیش یوبلئی مراسیملری کئچیریلیر.
محمد امین رسولزاده آذربایجان خالق جمهوریتینی قورماقلا یاناشی هم ده آذربایجانین گونئیینه خصوصی دقتی اولموش‌دور. عینی زامان‌دا گونئی آذربایجان‌دا میللی آزادلیق حرکاتلارینین گوجلنمه‌سین‌ده اونون ایدئیالاری، اؤزل‌لیکله قوردوغو آذربایجان خالق جمهوریتینین موستقیل‌لیگی بؤیوک رول اوینامیش‌دیر.
م.ا.رسولزاده ۱۹۱۸-جی ایل، مایین ۲۸-ده قورولان آذربایجان خالق جمهوریتینین بانیلرین‌دن بیری‌دیر. تورک دونیاسین‌دا ایلک دئموکراتیک پارلامئنت‌لی رئسپوبلیکا اولان آذربایجان خالق جمهوریتینین جمعی ۲۳ آی عؤمور سورمه‌سینه و روس اوردوسونون آذربایجانی ایشغال ائتمه‌سی نتیجه‌سین‌ده سوقوطا اوغراماسینا باخمایاراق، م.ا.رسولزاده نین قوردوغو دئموکراتیک آذربایجان دؤولتی اینسانلارا چوخ بؤیوک حقوق و آزادلیقلار وئرمیش‌دی. اینسانلارین برابرلیگی پرینسیپلرینه اساسلانان آذربایجان خالق جمهوریتی هله غرب‌ده بئله قادینلارین سئچمک و سئچیلمک حقوقو اولمادیغی بیر واخت‌دا قادینلارا بو حقوقو وئرمیش‌دی. آذربایجان‌دا ایلک اونیوئرسیتئتین، اوردونون، دونانمانین اساسی محض بو دؤورده قویولموش‌دور.
م.ا.رسولزاده ۱۹۱۸-جی ایلده فتحعلی خان خویلو ایله بیرگه آزربایاجان خالق جمهوریتینی قورماقلا معاصر دؤولت فورماسین‌دا آذربایجان دؤولتچیلیگینین اساسینی قویموش‌دور. بوگونکو آذربایجان رئسپوبلیکاسی م.ا.رسولزاده نین ایده‌آللاری و آذربایجان خالق جمهوریتینین ۳ رنگ‌لی بایراغی ایله آذربایجان دؤولتچیلیگینی داوام ائتدیرمک‌ده‌دیر
گونئی آذربایجان دئموکراتیک تورک بیرلیگی (گادتب) محمد امین رسولزاده نین قوردوغو آذربایجان خالق جمهوریتینی آذربایجان تورک میللتینین چوخ عصیرلیک دؤولت‌چی‌لیک تاریخینین پارلامئنت‌لی جمهوریت فورماسین‌دا معاصر دؤورده داوامی حساب ائدیر. موستقیل آذربایجان رئسپوبلیکاسینی م.ا.رسولزاده نین قوردوغو آذربایجان خالق جمهوریتینین واریثی کیمی تکجه قوزئی‌لی سویداشلاریمیزین دئییل، بوتون دونیا آذربایجان‌لیلارینین دؤولتی حساب ائدیر. بو دؤولت گونئی آذربایجان‌دا موستقیل آذربایجان دؤولتینین و عمومیتله بوتؤو آذربایجانین یارانماسی اوچون دایاق نقطه‌سی، ایدئیا قایناغی‌دیر. گونئی آذربایجان دئموکراتیک تورک بیرلیگی (گادتب) آذربایجانین گونئیینین میللی قورتولوشونو یالنیز و یالنیز ایستیقلال و جمهوریت ایداره اصولون‌دا گؤروب، آذربایجان خالق جمهوریتینی اؤزونه نومونه حساب ائدیر. گادتب م.ا.رسولزاده نین تورکچولوک ایده‌آللارینا صداقتله گونئی آذربایجانین موستقیل‌لیگی و بؤتوو آذربایجانین یارانماسی اوغرون‌دا فعالیت گؤسترمه یی اؤزونه شرف بیلیر.
اژدر تاغی‌زاده
گونئی آذربایجان دئموکراتیک تورک بیرلیگی (گادتب) باشقانی
