ادتاج اتحادیه دمکراتیک ترک آذربایجان جنوبی
قهرمان گونئی آزربایجان تورک میللتی!
وطن سئوه رآزربایجان اصناف و بازاریلاری!
۱۰۰ ایله یاخیندیر، پهلوی و سؤزده ایسلام جمهورییتی بوتون ایمکانلارین سفربر ائده رک چالیشمیش، آزربایجانی اقتصادی، سیاسی و اجتماعی آچیدان او قده ر گئری ساخلاسین کی، بئین، سرمایه و ایشچی قوه سی کؤچمه یه مجبور قالسین.
بئله لیکله، بیر یاندان میللتیمیزین آراسیندا آشاغیلیق کومپلکسی یاراداراق، فارس اوستونلویونون قبول ائدیلمه سینی آسانلاشدیرسین و باشقا یاندان آزربایجانیمیزین ژئوپولیتیک اهمییت و دئموگرافیسینی دگیشه رک سون آماجلارینا یعنی آزربایجان و آزربایجان تورکونو یوخ ائتمه یه چاتسینلار.
بو گون میلیونلارجا آزربایجان تورکونون ایران آدلانان اؤلکه نین دؤرد گوشه سینده یاشامالاری، تاریخی ندنلردن چوخ پلانلی شکیلده، مجبوری کؤچلره دایالیدیر.
آلنی آچیق آزربایجان میللتی!
شرفلی، یورد سئوه ر ایش آداملاری خصوصی ایله اصناف و بازاریلر!
۴۰ ایل انسان حاقلاری و بین الملل حقوقو هئچه سایان، ترور دولتینه دؤنوشن بیر سیستم حاکمییتده دیر.
بو رئژیم ایرقچی دوشونجه و یانلیش پولیتیکالاری سایه سینده، اؤزللیکله اقتصاددا اؤزباشینالیق و سؤموروجو منطقی ایله میللتلرین بوتون یئرآلتی و یئراوستو ثروت لرین تالان ائده رک اؤلکه نی شخصی مالیکانه لری کیمی اداره ائدیرلر.
بو گون بین الملل قوه لرین آغیر اقتصادی باسقیلاری و رئژیمین یانلیش سیاستی نتیجه سینده، ان چوخ ضرر گؤرن لردن بیری ده هئچ شبهه سیز اصناف و بازاردیر و طبیعی اولاراق، اونلارین اعتراضلارینا سبب اولاجاق.
آزربایجانین مبارز بازاریلاری!
سیز تاریخ بویو هر زامان میللتیمیزین ظلم واستبدادا قارشی دورما و آزادلیق ایسته ینه قاتیلیب و اؤن صف لرده ساواشاراق یوردوموزون آزادلیق سنگری عنوانی آلماسیندا بویوک امکلرینیز اولموشدور .
بو گون تاریخ و میللت سیزدن مستقیل شعار و میللی ایستک لر دوغرولتوسوندا صنفی مبارزه ایله میللی مبارزه نی بیرلیکده یوروتمه نیزی ایسته ییر.
بو گون سیزلرین اعتصاب و اعتراضلارینیز میللتیمیز و اؤزللیکله جوانلاریمیزی داها دا چوخ جسارتلندیره جک .
رئژیم سون نفس لرین وئرمک ده میللت میللی سرمایه نین میللی اولماسینی و میللتینین یانیندا دورماسینی ایسته مک ده دیر .
هئچ شبهه سیز سیز تاریخده اولدوغو کیمی یئنه استبداد و عدالتسیزلییه قارشی میللتله قول-قولا اولدوغونوزو گوسته ره جک سینیز.
یاشاسین آزربایجان
قهر اولسون ایشغالچی رئژیمه
