گونئی آذربایجان ایستیقلالچیلار بیرلیگینین (گایب) ایشغالچی فارس رژیمین کورد آچیلیمی ایله باغلی بیلدیریشی

گادتب: اشغالچی تهران رژیمی کورد یاییلیمی ایله گونئی آذربایجانا قارشی یئنی حمله لر پلانلاماقدادیر

کورد مسئله سی آذربایجانتورک  میللتینی دوشوندورن مسئله لردن بیریدیر. آذربایجانین قونشولوغوندا یاشایان کوردلرین ایچینده رئالیقدان اوزاق اولان گروپلارین وار اولماسی و بئله گروپلارین آذربایجان توپراقلارینا گؤز تیکمه سی هرکسه معلومدور.  طبیعی اولاراق اشغالچی تئهران رئژیمی و منطقه ده اؤز چیخارلارینی دوشونن خاریجی دؤولتلر کوردلرین بو ادعالاریندان مهارتله یارارلانیرلار. آذربایجان توپراقلارینا گؤز تیکن کورد باشچیلاری دا بو کئچیجی و مقصدلی حمایه لری فرصت بیله رک فایدالانماغا چالیشیب، اؤز اوزون وعده لی چیخارلارینی دیقته آلمادان راحتجاسینا اویونا گلمیش اولورلار. سون گونلرده آچیقلانان ایران اشقالچی رئژیمی نین کورد باشچیلاری ایله قاپی آرخالاریندا گوروشمه لری فتنه نین بویوتلارینین گؤسترگه سیدی. رئژیم چئشیدلی دؤورلرده ده کوردلرین تانینمیش شخصلری ایله گؤروشوب، سونرادا اونلاری تئرور ائتمه لری ده هر کسه معلومدور.

بوگون رئژیمین آغیر سیاسی، ایقتیصادی بؤحران ایچینده اولدوغو بیر آندا تکرار کورد باشچیلاری ایله دانیشیقلار آپارماسی مقصدلی بیرآددیم دیر. اونلاردان ماشا کیمی یارارلانماق ایسته ییر. خصوصیله آذربایجان وعرب میللتلری نین قورتولوش موباریزه سی ایران ترورچو رژیمینه ان جدی تهدید اولدوغونا گؤره رئژیم کوردلرین یاییلماسینا ایمکان یارداراق، اونلاری سلاحلاندیریر. ائله جه ده اونلارین ادعا ائتدیکلری توپراقلاری وعد ائدرک  گونئی آذربایجانا سالدیریلاری نین یولونو هامارلایب، بو واسطه ایله ده اونو تهدید ائدن ان گوجلی قووه نی ( آزربایجان میللی حرکاتینی) باشقا جبهه ده مشغول ائدرک بحرانی وضعیتدن چیخیش یولو آختاریر.  اشغالجی تئهران رژیمی بورادا بیر اوخلا نئچه هدفی ورماغا چالیشیر.

۱– کوردلری قارشی دورماقدانسا اونلاری اؤز یانینا آلماغا چالیشیر (بیر اورگانیزه اولموش مخالیفدن خلاص اولور).

۲– کوردلری، آذربایجان و عربلره قارشی یارارلاناراق بو ایکی گوجلو مخالیفی اؤزوندن اوزاقلاشدیریب، باشقا بیر جبهه ده مشغول ائتمک ایسته ییر.

۳– کورد باشچیلاری ایله آنلاشاراق اونلارا قارشی کنتروللو سالدیریلارلا بیر ایکی کوردو اؤلدوره رک اؤزونو آذربایجانین قورویوجوسو کیمی گؤستریب اطلاعات مامورلا ینی ایشه سالاراق، رژیم پاسدارلارینین شهید اولدوقلارینی تبلیغ ائتمکله، آذربایجانلیلارین حمایه سینی قازانماق ایسته ییر.

۴– کوردلری آذربایجان اراضی لرینه یئرلشدیره رک آذربایجانلیلاری بو اراضیلردن اوزاقلاشدیرماق ایسته ییر.

۵– آزربایجان و تورکیه سرحدینده دموگرافیک ده ییشیکلیکله باغلانتینی کسمک و  بونا گؤره ده داخیلی بؤحران شراییطینده کوردلردن باشقا میللتلره قارشی ووروجو گوج کیمی ایستیفاده ائتمه یی دوشونور. او آندا اؤزونو واسیطه چی کیمی گؤسترمک نییتینده دیر.

آمما بئله بیر اویون کورد خالقی اوچون خوش بیر نتیجه وئره ن بیر ایش دئییلدیر. خصوصیله آذربایجانلیلار کوردلرله یاخشی قونشولوق علاقه سی ساخلاماق ایسته دیی حالدا، آذربایجان توپراقلارینا گؤز تیکنلرله ده  کسین موباریزه آپارماغا قرارلیدیر. البته اونلارین بو حرکتلری اؤز خالقلارینا خئیر گتیرمه یه جکدیر. توپراق ایدعاسی قبول ائدیلمه زدیر. تئهرانین ایشغالچی رژیمینه اویوب، اویونا گلمه لری اوزون وعده لی اولاراق کوردلره یاخشی نتیجه باغیشلامایاجاقدیر.

بئله اویونلارین آپاریلدیغی بیر شراییطده اوزوموزو اؤز میللتیمیزه چئوریب دئمک ایسته ییریک کی، میللتیمیز چوخ آییق و هر جهتدن حاضیرلیقلی اولمالیدیر. ایرقچی رئژیمین باتی آذربایجاندا کوردلشدیرمه سیاستینه قارشی جانلا- ماللا فداکارلیغا حاضیر اولمالی دیر. قاراباغ فاجعه سی تکرار اولونمامالیدیر. رئژیمین اویونجاغینا  چئوریله ن کورد گروپلارینا قارشی اونلارین آنلایاجاغی دیلده جواب وئریلمه لیدیر. بونودا خاطیرلاتماق یئرینده اولارکی، کورد و تورک میللتلری نین اورتاق و آنا دوشمنی ایرانین اشغالچی رئژیمی دیر . او هدفه آلینمالیدیر. اونا قارشی اورتاق موباریزه داها الوئریشلی و مقصده اویقوندور. بیر ـ بیریمیزه قارشی دورماق تئهران رئژیمی نین ایسته یی دیر . آشکارجا اؤز الینی قانا باتیرمادان گلیب واسیطه چی رول اویناماق ایسته ییر. باشقا سؤزله دئسک، اؤز آغالیغینا مشروعییت قازاندیرماق نییتینده دیر. بونا ایجازه وئریلمه مه لیدیر.

محو اولسون ایرانین ایشغالچی رئژیمی .. .گونئی آذربایجان ایستیقلالچیلار بیرلیگی (گایب)