ادتاج اتحادیه دمکراتیک ترک آذربایجان جنوبی
گادتب: تهران رئژیمی نین گله جه یی، کیملر بو رئژیمین یئرینی توتا بیلرلر
یئر کوره سی نین تاریخینده ایلک دفعه اولاراق بیر ویروس آزارلیغی ( خسته لی یی) دونیا اؤلکه لری نین بیر چوخوندا بیر یاییلیم ( پاندئمی) آزارلیغینا چئوریلمیشدیر بو و یروسا یولوخان اینسانلارین چوخو اؤز دونیالارینی ده ییشمیشلر.
بو ویروسون اورتایا چیخماسی حاقدا اورتایا آتیلان تئوری و گوروشلرین اوستونه گئتمه دن بو ویروسون ایران دئییله ن میللتلر دوسداغیندا کی تاثیری . جاهیل تئهران رئژیمی نین دورومونو نظره آلماق ایسته ردیک.
بو ویروس بو دوسداقدا یاشاماق مجبورییتینده اولان میللتلره آجی بیر خاطیره نی خاطیرلادیر. یعنی مقصدلی اولاراق بو رئژیمین حاکمیته گتیریلدییی گونلری. اوگونلرده طرح اولونموش مقصدلی ایران ـ عراق ساواشیندا خمینی نین دئدییی «ساواش نعمت دیر» سوزونو یادیمیزا سالیر. تئهران رئژیمینه منصوب شخصلر بونو دئمه سه لرده ویروسون اورتایا چیخماسی اونلار اوچون ایکینجی بیر نعمت دیر.
چونکی رئژیم داخیل و خاریجده آغیر بیر باسقی آلتیندا ایدی. عراقدا تئهران رئژیمی علئیهینه اعتیراضلار دوام ائدیردی، داخیلده ایسه ناراضیلیق نتیجه سینده ۱۳۹۸ ـ نجی ایلین آبان آییندا ایران آدلانان یئری بوروین اهالی نین قیامی، قدار رئژیم طرفیندن باسدیریلیب، اهالی نین ـ قتل عام ائدیلمه سی، بئین الخالق ایجتماعیتی و خصوصیله اینسان حاقلاری تشکیلاتلاری باسقی سینا معروض قالمیشدی.
قوم شهرینده بو ویروسون اورتایا چیخماسی و رئژیمین جهالت و نادانلیغی اوزونده ن بوتون اولکه یه یاییلماسی ایجتماعیتین فیکرینی جایدیردی، بیر صورتده کی، بو ویروس اولماسایدی ایران دئییله ن یئرده داها شیدتلی اعتیراضلارین شاهیدی اولاجاغیدیق. حتا بو ویروسون وارلیغینی گیزله دیب سوزده سئچگیلر آپارماسی و سئچگیلرده یئنیلگی یه اوغراماسی نی دا اؤرت ـ باس ائتمه یه چالیشدی.
رئژیمین ماهیتی – ایچتن لی یی .
بوتون بو گوروننلری و کئچه ن ۴۰ ایلده یاشانان جینایتلری گؤره ـ گؤره بیر چوخلاری بو رئژیمین ایچتن لی یینه پئی آپارمایب، اونون ماهییتینی تانیماقدا زورلوق چکیرلر. و هله ده ایمامزادادان معجزه اومورلار. بونا گؤره ده آپاریلان ضید ـ نقیض تاکتیکلرین هئچ بیری باشاریلی اولمور. بونا میثال «پاسدارلارا » قارشی اولان موناسیبت دیر. بو قوروم رئژیمین وارلیغینی قوروماق اوچون بوتون جینایتلری ایشمه دیی گؤز آردینا وورولور. میثال اوچون تصادوفی اولاراق بیر کوردله قارشی دورمادا اولورسه، بعضی اؤزوموزدن اولانلار اونو شهید آدلاندیریرلار. بورادا بؤیوک تناقض واردیر. رئژیمه قارشی ساواشدیغیمیز هارا، اونون ان قدار و جانی قورومونا شهید دئمک هارا؟
ائله بو خطایا بو رئژیمی حاکمیته گتیریله ن گونلرده ده شاهید اولدوق. اؤروموزو توپارلییا بیلمه دیک . اوردویا گووه نی اولمایان خمینی رئژیمی اوردو ایله یاناشی سوزده اینقیلاب کئشیکچی لرینی «پاسدارلاری » قوردوغوندا بیر چوخلاری بونون کئچیجی اولدوغونو سانیردیلار. و بیر از مدت سونرا ژاندارمئری و اوردویا قاتیلاجاقلارینی دوشونوردولر . چونکو حقیقتن اینقلاب ائتدیکلرینی دوشونوب، غرب طرفیندن گتیریله ن بو رئژیمین اینقلابی بیر رئژیم اولدوغونو سانیردیلار. و حتا مولالارین اوزون بیر مدت حاکمییت ده قالمیاجاقلارینی ظن ائدیردیلر. آمما بو گتیریله ن رئژیم مقصدلی اولاراق اینقلابی تبلیغاتلارلا خالقین باشینی قاتماقدا ایدی. گئت – گئده بسیجی و پاسدار کسیمی بوتون ساحه لرده خصوصیله رفسنجانی دؤورونده ایقتیصادی ساحه ده بؤیوک نائلیت لر الده ائتدیلر. ساواش دؤورونده ده چئشیدلی ساواش قابلیتینی آرتیراراق قونشو اؤلکه لرده موزدور شیعه لردن تئرورچو دینی دسته لر یاراردیب، ایران دئییلن یئرده اولدوغو کیمی، اینسانلارین دینی اینانجیلاریندان سو ایستیفاده ائده ره ک ، اؤز حوکومتلرینه قارشی ساواشماغا و ایران خئیرینه جاسوسلوق ائتمک اوچون ایشه سالیندیلار. بونون آچیق نمونه لرینی, عراق، افغانیستان، سورییه، یمن، و …گورمک مومکوندور. حتا قوزئی آذربایجانیمیزدا بئله آذربایجان حوکومتینه قارشی دینی قوروبلار دوزه لدیب ، حوکومته قارشی قویماغا تشویق ائدیرلر. اؤلکه خارجینده کی بو نئروریست چالیشمالاری نین یانیندا اؤلکه داخیلینده ده پاسدارلار بوگون مدافعه، خاریجی، داخیلی، تیجارت، صنایع و نفت ناظیرلیکلرینی اله کئچیرمیشلر. حتا مالی موسیسه لر اوجومله دن ورزش، شهرداریلار رادیو ـ تئلویزیا و مطبوعاتدا سپاهین کونترولوندادیر. و گورولدویو کیمی سوزده سون پارلامئنت سئچگیلرینده ده مولا مجلیسینه سئچیله نلر بو کسیمده ن اولموشدور. حقیقتده اولکه هر ساحه ده بو قورومون الینه دوشموشدور. اونلار بونونلا دا راضی اولماییب، حاکمیتی تام اله کئچیرمک نیتینده دیرلر ، ظاهیری تبلیغاتلاری نین عکسینه بو قورومون یوکسک سویه لی قده مه لری آمئریکا باشدا اولماقلا سوزده ایران موخالیفتی ایله ده معامله لره آپارماقدادیر. سولئیمانی بو اویونون و اولاجاق کودتانین اساس اویونجولاریندان ایدی . آمما بئله رادیکال ده ییشیک لیک آرزو ائدیلمه ین چتینلیکلره سبب اولاً بیله ردی. بونا گوره ده تئهران حاکمیتی نین راضی لیغی ایله سولئیمانی اورتادان قالدیریلدی . و ریزی ایتیرمک اوچون داخیلی و خاریجی تبلیغاتلا اوندان بویوک بیر میللی قهرمان یارادیلماغا چالیشیلدی. رئژیم بو شکیلده اونون طرفدارلاری دا لال ائتمه یی باجاردی . نئجه کی واختی ایله بهشتی و اونون چئوره سینده اولانلاری تمیزله دیلر. سولئیمانی سیزدا حاکمیت گئت ـ گئده پاسدارلارین الینه دوشموشدور.ایسته ر ـ ایسته مز بو گلیشمه نین نتیجه سینی چوخ یاخیندا گوره جی ییک، ریضا پهلوی آمئریکادا، موسوی و آمئریکا ایله واختی ایله فرانسا و سویسده معامله ائده ن کروبی دا هله لیک توروشو کوپونده دیرلر.لازیم اولاندا چیخاردا رلار. عمومیتله ایران دئییلن یئرده مولاییم بیر رئژیم ده ییشمه سینه اوستونلوک وئریلیر. چونکو رادیکال ده ییشمه ده ایران دئییله ن یئرین داغیلماسی تهلوکه سی واردیر اونلار بونو ایسته میرلر.
اؤلکه ده کی موجود دوروم
یوخاریدا قئید ائدیلدییی کیمی پاسدارلار بوتون ساحه لرده او جومله دن امنیت ساحه لری اونلارین الینده اولدغوندان میللتلرین خصوصیله یوخسوللارین ناراضیلیقلارینی درک ائدیرلر!
اؤلکه ده موجود اولان نئچه مین قات اینفیلاسییا، ایش سیزلیک باهالی لیق میللتین بئلینی سیندیریر، حتا اورتا کسیمین بئله یاشایا بیلمه سی نین چتین اولدوغونو گورورلر!
فارس اولمایان میللتلر او جومله دن آذربایجانلیلار داها ایران دئییله ن میللتلر دوسداغیندا یاشاماق ایسته میرلر!
چئشیدلی اعتیراضلار و قیاملارین قانلیجا باسدیریلمالاری بیر شئیی ده ییشمیر، عکسینه حرکتلرین داهادا شیدتلنمه سینه سبب اولور.!
بوتون بونلار نظره آلیندیقدا ایران دئییله ن یئرده بیر رئژیم ده ییشمه سی و سیلاحلی قارشی دورمانین احتمالی چوخدور، بو رئژیمی حاکمیته گتیره نلر بئله بونو درک ائدیرلر.چونکو بوردا ایران آدلانان یئرین بقاسی یاحود داغیلماسی اساس مسأله دیر. بونا گوره ده هله لیک گیزلی و آشکار کئچیجی ده اولموش اولسا ، بو رئژیمین آیاخدا دورماسینی ایسته ییرلر. ایران دئییله ن یئرده سیلاحلی بیر قارشی دورما، میللتلر آراسی توقوشمالار منطقه ده غربین چیخارلاری نین علئیهینه دیر.آمما بو اونلاردان آسیلی دئییلدیر. ایران دئیله ن میللتلر دوسداغیندا فعلا یاشاماق زوروندا اولان میللتلردن آسیلی دیر.
رئژیم و گونئی آذربایجان
موجود رئژیم یوخاریدا قئید ائدیلدیی کیمی بو اینقلابی آب ـ هاوانی درک ائدر، آمما اونو و اونون حامیلرینی قورخودان گونئی آذربایجان مسئله سیدیر. نفوذ باخیمدان ان بویوک گوجه صاحیب اولان آذربایجان میللتی نین آییلماسی و اوز یولونو تهراندان آییرماسی اوچوروم حالینده اولان بو رئژیمی قورخوتدوغو کیمی، غربین و شرقین بو اولکه ده کئچن بو یوز ایللده حیاتا کئچیردیی توکلویو و آذربایجانچیلیغی یوخ ائتمه پیلانلارینی تهلوکه یه سالماقدادیر . رئژیم و اونو حاکمیته گتیره نلر بونو ایلک گونده ن بیلیردیلر، و یوووزدورما سیاستینی قاباغا آپاریردیلار. ائله آمئریکادا حاضیرلانمیش بوگونکو رئژیمی ین آنایاساسیندا او بیری میللتلر حاقدا بیر نئچه مادده نین قویولماسیدا بوشونا دئییل ایدی ، حقیقی ایستکلردن اوزاقلاشدیرما ، یالاندان وعده ـ وعیدلرله مشغول ائتمک اوچون ایدی. شاهی آپارسالاردا فارسچیلق و آریاچیلق، توپراق بوتونلویو مسئله سی قالمالی ایدی. اونلار اوچون آنا دوشمن اولان آذربایجانلی یا توهینلر ، حقارت لر ،آلچاتمالار و آسیمیلاسیا سیاستی دوام ائتمه لی ایدی.
آذربایجان میللی حرکتی نین یارانماسی بونلاری ایلک باشدا چاش ـ باش ائتسه ده ، رئژیم در حال قارشی پیلانلارا، چئشیدلی طرح لره آل آتیب میللی حرکتی ایچینده ن یوخ ائتمه یی هدف آلمیشدیر. میللی فعاللارین بعضیلرینده چاش ـ باش سالمیشدیر.میللی فعال آدی ایله میللی حرکتین ایچینه رخنه ائدیله ن بو شخصیلر میللی حرکتین ماهیتینه ضید اولان حرکتلره ال آتیرلار اوچومله دن :
رئژیمین قونشو اولکه لره موداخیله سینی ، بو اولکه لرده داخیلی ساواشلاری حمایت ائتمک!
قاسیم سولئیمانی کیمی جینایتکار تئروریستی مه نیمسه مک!
مستقیم و غئیر مستقیم پاسدارلاردان حمایت ائتمک، حتا ایران دئییله ن میللتلر دوسداغی نین قارانتی سی کیمی گورمک!
آذربایجانا قارشی تئروریست کورد گروپلارینی حمایت ائتمک ، حتا اونلارلا اوتوروب دانیشیقلار آپارماق!
رئژیم ییخیلیرسا کوردلر باشاریلی اولوب، اوتوزان بیز اولاجاییق دئمه لری!
کئچمیش رئژیمین دئدیکلرینی تیکرار ائتمک ، ایران تورکلرین الینده دیر، ایران تورکلرین دیر، ایندی ایران آدلانان یئرین یولودا تومندیر، بو ناحاقجاسینا ریال ائدیلمیشدی !
سوزده تورکلوک و«ایران یورکلری » مسئله سینی قابارداراق آذربایجان و آذربایجانچیلیغی اونوتدورماق، اونا قارشی چیخماق!
بو رئژیم ییخیلیرسا مجاهیدلر و شاهچیلار حاکمیته گله جکلردییه قورخورتماق !
حتا مجازی دونیادا جینایتکار دوشمن و رئژیمله امکداشلیغی آغیلی لیق و سیاسی گوسترمه یه چالیشیرلار!
گورولدویو کیمی بو وئریله ن دئییش لرین هئچ بیری میللی داوا و میللی حرکتله علاقه سی اولمایان ، اونا تمامیله ضید اولان دانیشیقلار و فیکیلردیرکی، رئژیمین طرفیندن میللی حرکتین ایچینه گتیریلمه یه چالیشیلیر . رئژیمین معمارلاری یالنیز بونونلادا قالماییب، اسکی مئتودلارلا یاسالاما و آلداتما سیاسیتلرینه خوشا گلیم سوزلرده علاوه ائدیرلر، هدف آذربایجانلیلاری تیکرار آلداتماقلا یاناشی، قارشی دان گه لن سوزده جیمهور ره ییسی سئچگیلرینه قاتیلمالارینا زمین یارادیرلار. میثال اوچون:
۱۵ و۱۹ـنجو ماده لرین ایجراسی!
فارس دیلی ایله یاناشی آنا دیللرین اوخونماسی!
مجلیسده(؟!) میللی گروهلارین تشکیلی!؟
فئدرالیزم و یا بیر نوع میللی ایداره سیستئمی!
سیاسی فیرقه لرین(حزب)لرین ، میللی فیرقه لرین قورولوشو!
گوروندوغو کیمی بو جینایتکار و ایشغالچی رئژیم هدفلی اولاراق بئله سوزلری اورتایا آتیر ، چونکو بئله ایستکلر محتاط ، جیدی قارشی دورمادان قورخانلارین مزاغینا اویقوندور. چونکو اونلار رئژیمین ییخیلماسی ایله ایرانین داغیلاجاغینی و قان توکوله جه یینی ایره لی سورورلر. بو کسیمین ایچینده سیاسی اولمایان صداقتلی اینسانلار اولسادا عملده رئژیمین قازانینا سو توکورلر. و رئژیمده هامان نقطه دن حرکت ائدیر. ایرانین داغیلماسینی نه حاکمیت ، نه شاهجی نه مجاهید و نه حتا بو آغالاری آیاقدا ساخلایان اربابلاری ایسته ییر.لاکن اونلارین ایسته یینده ن آسیلی اولمییاراق
آذربایجان میللی حرکتینین ایسته کلری قئید ائدیلن بو اسالار اوزه رینده قورولموشدور
ازونو ایران دئییله ن میللتلر دوسدغیندان قورتارماق ، فارسلارین ایشغال و مستعمره سینده قالماغا سون قویماق !
آذربایجان دئموکراتیک حقوق دولتینی ، پارلئمنتاریزم، لاییک و سئکولئرلیک اوصولونا دایاناناراق برپا ائتمک !
اولکه میز آذربایجاندا ایجتماعی عدالتی ، قادین و کیشی آراسیندا برابرلییی برقرار ائتمک !
بوتون میللی ثروتلریمیزی اولکه میزین آلت یاپیسینا ، میللتیمیزین رفاهینا خارجاماق !
اوزون وعده لی اولاراق، دانیشیقلار یولو ایله، یادلار الی ایله پارچالانمیش وطنین وحدتینی تامین ائتمک!
آذربایجانین داخیلینده فئدرال بیر دولت یاراداراق، ایالتلرین اوزلرینی ایداره ائتمه لرینی ، گلیشمه لرینی ؛ مستعمره دن قالان تورتوکونتولری ترمیم ائتمه یه تیمکان ساغاتماقلا یاناشی ، بوتون آذربایجان چاپیندا حیات سوییه سی نین یوکسه لیشینی تأمین ائتمکدیر، یعنی اجتماعی عدالتله بیرگه بیر نوع میللی ایداره سیستئمینی یاراتماقدیر
گورولدوغو کیمی آذربایجان میللی حرکتی نین ایستکلری و ایش دوزه نی ( برنامه سی) آچیق و آشکاردیر.میللی حرکت بو ایده آللار اوغروندا موباریزه آپاریریر.
نتیجه
بیزه گوره بو رئژیم حیاتی نین سون دوورونو یاشاماقدادیر ، حتا اربابلاری طرفیندن زورلا حاکمیتده ساخلاسالاردا ، بو رئژیم ین ماهیتی کئچه ن بو ۴۰ ایلده میللتیمیزه بللی دیر . میللتیمیز نه بو رئژیمی نه ده هر هانسی بیر کوینک رنگینی ده ییشمیش رئژیمین حاکمییتی نی قبول ائتمیه جکدیر چونکو اونون پایاسیدا ایران دئییله ن میللتلر دوسداغی نین حدودلارینی قوروماق ،فارس مستعمره چیلیک ، ایشغالچیلیق و ایرقیچی رئژیمینی قوروماق اولاجاقدیر.
شاهدا، شیخده ۱۰۰ ایلدیر میللتیمیزین تاریخینی ، میللی آبیده لرینی ، کولتور و مدنیت و عنعنه لرینی یوخ ائتمیش و ائدیلمکده دیر. و میللی وارلیغیمیز دانیلماقدادیر ..وئریله جک یئنی وعده وعیدلره اویاجاق دئییلیک .
هئچ بیر زامان بیزیم ایستکلریمیزی نه بوگونه قده ر حاکمیتده اولانلار ، نه ده اوزلرینی بو رئژیمه آلترناتیو گوستره نلر قبول ائده جکلر . اونلار ایرقچی لیق و آریاچیلیق گوروشلریندن وازکئچمییه جکلر.
بونا گوره ده آچیق و گیزلی آذربایجانیمیزین بوتون تاریخی اراضیلرینده گئنیش بیر تشکیلاتلانمایا گئتمه لی ، میللی قورتولوش ساواشینا ، ایستیقلالیت اوغروندا موجادیله یه دوغرو هر جهتلی حاضیرلانمالی ، هئچ بیر کسده ن ، اولکه دن یاردیم اوممامالی ، یالنیز اوزوموزه ، اوز میللتیمیزه اینانمالی ییق. حاق وئریلمه ز ، حاق آلینان بیر شئی ذیر.
یاشاسین میللی قورتولوش ساواشی
