گادتب: تورک اوردوسونون قوزئی آذربایجانا تعلیملر اوچون گلیشی بوتون قوزئی و گونئی آذربایجاندا، تورک دونیاسیندا هامیدا فرح دوغورموشدو. چونکی، تورک اوردوسو تورک میللتینین اوردوسودور. بیز 200 ایلدیر روس اوردوسونون ایشغالچیلیغینین آجیناجاقلی نتیجهلرینی قافقازدا و گونئی آذربایجاندا گؤرموشوک. روس اوردوسونون بیرباشا یا اؤزو یا دا اونون ال آلتیلارینین ییرتیجیلیغینی قافقازدا گؤرموشوک. بو گون اؤز اوردوموز اولان تورک اوردوسونون قافقازا گلیشی بیزیم اوچون سئویندیریجیدیر و اوره ییمیزدن گلن بیر ایستکدیر.
اوکراینایا سوخولاراق، خصوصیله گؤزل کریمی ایشغال ائدهرک، ائلهجه ده آذربایجانا نفوذ ائتمک ایستمکله ایشغالچی روسیا ایسته ییر کی، ایمپئریالیست سیاستی ایله یئنی ایمیج قازانسین. اونا گؤره ده بو گون تورک اوردوسونون آذربایجانا تعلیملره گلمهسی بیزیم هامیمیزین اوره ییمیزدندیر.
هله ده آذربایجان جمهوریتینده روس قالیقلاری و خصوصیله روسا و ایرانا باغلی اولان بعضی قوهلر آذربایجانا و تورکه قارشی تبلیغاتا و قارایاخمایا باشلامیشلار. آنجاق بو گون قورتولوش محاربهسینده قوزئیده و گونئیده آذربایجان تورکو، ائلهجه ده قازاخ، قیرغیز و باشقا تورکلر بیرلیکده حرکت ائتمهلیدیر.
نظره آلماق لازیمدیر کی، بو گون روسیا اؤزونون ان کؤهنه دمیر پارچالارینی سلاح آدینا تورک دؤولتلرینه باها قیمته سیریییر، ان گوجلو سلاحلارینی ایسه ائرمنیستانا وئریر. لاکین تورکیه اوردسو دونیانین مودئرن و چاغداش سلاحارینا مالیکدیر. تورک اوردوسونون آذربایجانا گلیب و آذربایجان اوردوسو ایله تعلیم کئچیرمهسی، ائلهجه ده آذربایجان اوردوسونو مودئرن سلاحلارلا تجهیز ائتمهسی بیزیم هامیمیزین اوره ییمیزجهدیر. لاکین روسیا اؤزونون تورکه قارشی ایشغالچی و ایمپئریالیست سیاستیندن ال چکمیر و آرتیق اونون واختی گلمیشدیر کی، روسیانین و روس قالیقلارینین قافقازدان و تورک دونیاسیندا بیردفعهلیک آتیلماسینا باشلانیلسین. بو گون هم روس ایشغالچیلارینین، هم فارس ایرتیجاچیلارین، هم ده ائرمنی ایشغالچیلارین، ائلهجه ده روسا و فارسا باغلی اولان قوهلرین بیردفعهلیک آخیرینا چیخماق اوچون آذربایجان دؤولتی، آذربایجان تورک میللتینین ایسته یی اساسیندا تورکیهنین آذربایجاندا حربی بازالار یاراتماسی بو میللتین تاریخی ایسته ییدیر و واجیبدیر. اونا گؤره بیز آذربایجانین گونئییندن اولان آذربایجان تورکلری ده بو تعیلمی دستکله ییریک. قورتولوش موجادیلهمیزده بیزه کؤمک اولاجاق اؤز اوردوموز اولان تورک اوردوسونون آذربایجاندا اولماسی بیزه سو و هاوا کیمی ضروری اولان بیر مسئلهدیر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی