ادتاج اتحادیه دمکراتیک ترک آذربایجان جنوبی
گادتب: گونئی آذربایجان دموکراتیک تورک بیرلیگی (گادتب) باشقانی سایین اژدر بی تاغیزاده 8 مارت- بئین الخالق قادین‌لار گونو موناسیبتیله گونئی‌لی- قوزئی‌لی آذربایجان و تورک دونیاسینین خانیم‌لارینا تبریک مئساژی عنوانلاییب.
سایین اژدر بیین 8 مارتلا باغلی تبریک مئساژینین بیر حیسه‌سینده دئییلیر: “تاریخاً تورک دؤولت‌لرینده قادین‌لارا یوکسک ده یر وئریلیب و خانیم‌لارین حقوقو قورونماقلا اونلارین یوکسک اجتماعی موقعیی اولموش‌دور. تورک خانیمی تاریخ بویو هر زامان چوخ بؤیوک سایغی و احتیراملا آنیلمیش‌دیر. تورک خاقان‌لاری قادین‌لارینی “او دا منیم خانیم و بییم” دئیه تانیدارمیش‌لار. بو دا تورک دونیاسیندا تورک خانیمینین یوکسک اجتماعی موقعیی‌نین گؤستریجیسی‌دیر.
آرخئولوژی قازینتی‌لار زامانی دا تورک دونیاسی و آذربایجان اراضی‌سین‌دن تاپیلان سون تونج و ائرکن دمیر دؤورونه عاید یوزلرله سلاح‌لی قادین قبیرلری تورک قادین‌لارینین تاریخ‌ده کی رولونو گؤستریر. تورک جمعیتی‌نین تخمیناً یاری‌سینی تشکیل ائدن خانیم‌لار تاریخ بویو ایگید اوغول‌لار تربییه ائتمکله یاناشی، هم ده تورک کیشی‌سی ایله چیگین-چیگینه تورک جمعیتی‌نین اینکیشافیندا فعال ایشتیراک ائتمیش‌دیر. بو گون گونئی آزربایجانین ایستیقلال مجادیله‌سینده ده خانیم‌لارین چوخ بؤیوک رولونون اولماسی تصادفی دئییل‌دیر.
تورک خانیمی بو گون آذربایجان تورک میللتی‌نین حقوق‌لاری و موستقیل‌لیگی اوغروندا مباریزه آپارماقلا یاناشی ایران آدلانان یئرده محدودلاشدیریلمیش ان آدی حقوق‌لارینی الده ائتمک اوغروندا دا مباریزه آپارماغا مجبور اولموش‌دور. خانیم‌لاریمیزا بو مقدس مجادیله‌میزده اوغورلار دیله مکله، بوتون تورک قادین‌لارینی، او جمله‌دن آذربایجان خانیم‌لارینی و ایشغال‌چی ایران اسارتینه قارشی وطنیمیزین موستقیل‌لیگی اوغروندا مباریزه آپاران بوتون خانیم‌لاریمیزی بئین الخالق قادین‌لار گونو موناسیبتیله تبریک ائدیرم.
بایرامینیز موبا‌رک!
اژدر تاغیزاده
گونئی آذربایجان دموکراتیک تورک بیرلیگی (گادتب) باشقانی”
