GADTB-nin Mətbuat Mərkəzinə daxil olan məlumata görə, dünən Güney Azərbaycan şəhərlərində müxtəlif tədbirlərlə 21 Azər- Milli Hökumətin ildönümü anıldı.
Azərbaycanlı milli-mədəni fəallar Təbriz şəhərinin duvarlarında qrafitlər çəkib, afişalar yapışdırmaqla 21 Azər – Milli Hökumətin qurulmasını anıblar.
Təbrizdə həmçinin ingiliscə “Güney Azərbaycan İran deyil” şüarları yazılıb. Təbrizlə yanaşı bir neşə Azərbaycan şəhərində, o cümlədən Urmiya və Ərdəbildə də azərbaycanlı fəallar müxtəlif yerlərdə şirniyyat paylayıb və 21 Azər Hərəkatının ildönümünü anıblar.
Həmçinin azərbaycanlı fəallar, ictimai yerlərdə “Azərbaycan talandı-millət oyan amandı” şüarları yazaraq, Güney Azərbaycan mədənləri və yeraltı sərvətlərinin talanmasına və mərkəzi hökumət tərəfindən sistemli ayrıseçkilik və müstəmləkə siyasətinin tətbiq edilməsinə qarşı etirazlarını bildiriblər.
Güney Azərbaycanın Qəzvin şəhərində də azərbaycanlı milli fəallar şəhər divarlarına “21 Azər Azərbaycan türklərinin soyqırım günüdür” yazmaqla İran rejiminə etirazlarını bildiriblər.