GADTB Güney Azərbaycan Demokratik Türk Birliyi
GADTB: Tikantəpə rayonunda yerləşən Zərəhşuran qızıl mədənində işçilərin etiraz aksiyası təxminən iki həftədir davam edir.
Qərbi Azərbaycan əyalətində yerləşən bu iri qızıl mədəninin işçiləri 22 Azər tarixindən etibarən əməkhaqqı ödənişlərində bərabərsizliyə və ayrı-seçkiliyə etiraz olaraq iş dayandırıblar. Etirazın əsas səbəbləri sırasında vəzifə və peşələrin dərəcələndirilməsi planının icra edilməməsi, rəsmi və podratçı işçilər arasında mövcud olan maaş fərqləri, eləcə də ağır iqtisadi şəraitdə artan məişət problemləri yer alır.
İşçilər bildirirlər ki, böyük həcmdə sərvət istehsal edən bir mədən müəssisəsi öz əməkdaşlarını yaşayış baxımından çıxılmaz vəziyyətdə buraxmamalıdır. Onların əsas tələbləri əməkhaqqında ədalətin təmin olunması, işçilər arasında ayrı-seçkiliyə son qoyulması və mövcud iqtisadi təzyiqlər fonunda sosial durumun yaxşılaşdırılmasıdır.
Etirazların başlamasından təxminən iki həftə keçməsinə baxmayaraq, indiyədək mədən rəhbərliyi, Tikantəpə rayonunun Əmək İdarəsi və ya əyalət səviyyəsində məsul qurumlar tərəfindən hər hansı təsirli addımın atıldığı barədə məlumat yayılmayıb.
Mədən işçiləri vurğulayıblar ki, bütün tələbləri tam şəkildə yerinə yetirilənədək tətili davam etdirəcəklər.
