İsrailin müdafiə naziri: İran rejimi ilə müharibədə əldə olunan nailiyyətlərlə kifayətlənməməliyik

GADTB: İsrailin müdafiə naziri Yisrael Katz bildirib ki, İran rejimi ilə müharibədə əldə olunan mövcud nəticələrlə kifayətlənmək olmaz. O, həmçinin vurğulayıb ki, İrana çatan hər bir dolların Hizbullah, Hamas, husilər və Tehranın digər müttəfiq qruplarına yönəldilməsi ehtimalı var.

Katz Müdafiə Nazirliyinin Terrorun Maliyyələşdirilməsinə Qarşı Mübarizə üzrə Milli Qərargahının təşkil etdiyi “İqtisadi Mübarizə” konfransında çıxışı zamanı deyib ki, İran hakimiyyəti vətəndaşlarının rifahına sərmayə qoymaq əvəzinə öz resurslarını “terror fəaliyyətlərinə” sərf edir.

Nazir qeyd edib ki, Tehrana daxil olan maliyyə vəsaitləri regiondakı İran tərəfdarı silahlı qrupların fəaliyyətinin maliyyələşdirilməsinə yönələ bilər.

İsrailin müdafiə naziri əlavə edib: “Bu gün heç bir ölkənin kosmosdan hücum etmək qabiliyyəti yoxdur. Biz bu sahədə dünyada öncül olmalıyıq və hazırda ən yaxşı beyinləri cəlb edirik.”

Katzın sözlərinə görə, İsrail gələcəkdə kosmik texnologiyalar və uzaqmənzilli hərbi imkanlar sahəsində üstünlük əldə etməyə çalışır.