GADTB Güney Azərbaycan Demokratik Türk Birliyi
GADTB: Amerikanın Səsinin fars bölməsinin “Omq-e Meydan” proqramında aparıcı Fatimə Xezr Heydərinin Mustafa Hicri ilə müsahibəsi zamanı diqqət çəkən iddialar səsləndirilib.
Proqramda əsasən İran Kürdüstan Demokrat Partiyasınin silahlı fəaliyyəti müzakirə olunub. Mustafa Hicri bildirib ki, partiyasının silahlı fəaliyyəti hazırda dayandırılıb, lakin silahlı mübarizənin tamamilə başa çatdığını düşünmür və bunun gələcəkdə yenidən gündəmə gələ biləcəyini deyib.
Veriliş zamanı aparıcı Fatimə Xezr Heydəri bildirib ki, onların əldə etdiyi məlumata görə, İran, ABŞ və İsrail arasında baş vermiş son münaqişə zamanı silahlı kürd qrupları Tehrana doğru quru əməliyyatında iştirak etməkdən imtina ediblər. Onun sözlərinə görə, həmin qruplar bunun əvəzinə Urmiya istiqamətində quru irəliləyişi həyata keçirə biləcəklərini və onun ifadəsi ilə desək, “ortaq kürd–azəri bölgələri” üzərində nəzarəti ələ ala biləcəklərini bildiriblər.
Mustafa Hicri isə müsahibə zamanı bu iddianı təkzib etməyib.
Xəbərdə əlavə olaraq qeyd olunur ki, Amerikanın Səsinin fars bölməsinin hazırkı rəhbərliyində kürd jurnalist Əli Cavanmərdinin yer alması və Mustafa Hicrinin bu iddianı rədd etməməsi səbəbindən, müəlliflər səsləndirilən məlumatın doğru ola biləcəyini irəli sürürlər.
Həmçinin bildirilir ki, bəzi media orqanlarının məlumatına əsasən, Türkiyənin ABŞ-yə göstərdiyi təzyiq silahlı kürd qruplarının planlaşdırıldığı iddia olunan quru əməliyyatının ləğv edilməsində rol oynayıb.
