Macarıstanda VI Hun-Türk Qurultayı başlayır

GADTB-nin Mətbuat Mərkəzinə daxil olan məlumata görə, avqustun 8-13-də Macarstanda VI Hun-Türk Qurultayı keçiriləcək.

Bu barədə Azərbaycan türkləri və digər Türk Xalqlarının Əməkdaşlıq Mərkəzinin (ATXƏM) icra katibi, “Birlik” jurnalının baş redaktoru İlqar İlkin açıqlama verib.

İlqar İlkinin sözlərinə görə, hər iki ildən bir keçirilən qurultayda Azərbaycan, Türkiyə, Qazaxstan, Özbəkstan, Türkmənistan, Qırğızstan, o cümlədən bir çox dövlətlərin tərkibində muxtar subyekt olaraq yaşayan türklər iştirak edəcək. Həmişə olduğu kimi bu qurultayda da 30-a yaxın ölkədən 300 minə yaxın ziyarətçinin qatılacağı ehtimal edilir.

Quzey Azərbaycandan isə qurultayda iştirak etmək üçün ATXƏM sədri İlham İsmayılov, Milli Məclisin deputatı Qənirə Paşayeva, sənətçi Şəmistan Əlizamanlı, “Birlik” jurnalının baş redaktoru İlqar İlkin, QHT təmsilçisi Arzu Bağırova sabah Macarstana yola düşəcək.

Qeyd edək ki, qurultayda türk dünyasını düşündürən məsələlər, birgə fəaliyyət proqramları da müzakirə olunur. Eyni zamanda qurultay Türk xalqlarının birlik və bərabərliyini gücləndirmək üçün önəmli bir əməkdaşlıq platformasıdır.