GADTB Güney Azərbaycan Demokratik Türk Birliyi
GADTB: Güney Azərbaycanın “Traxtur” futbol klubunun sabiq futbolçusu və hazırda “Akademiya Kiya” klubunda çıxış edən Peyman Keşavərz, 1404-cü il bəhmən ayının 1-də Təbriz şəhərində İran İslam Respublikası Kəşfiyyat Nazirliyinin əməkdaşları tərəfindən saxlanılıb. Həbs olunduğu vaxtdan indiyədək onun ailəsi ilə yalnız bir qısa telefon danışığı baş tutub ki, bu da yaxınlarının dərin narahatlığını aradan qaldırmayıb.
Sosial şəbəkələrdə yayılan bir videoda Peyman Keşavərz Nəzərli (Nadarlı) Azərbaycan tarında ifası ilə öz mədəni və bədii kimliyini ifadə edir. Bu gün həmin musiqi sədaları onun yoxluğunu daha da acı şəkildə xatırladır.
Bu azərbaycanlı idmançının saxlanılmasından 15 gün keçməsinə baxmayaraq, onun harada saxlanıldığı, fiziki və hüquqi vəziyyəti, eləcə də ona yönəldilən ittihamlar barədə hələ də heç bir rəsmi və aydın məlumat yayılmayıb. Davam edən bu qeyri-müəyyənlik ailəsi və yaxınları arasında ciddi narahatlıq doğurur.
