GADTB Güney Azərbaycan Demokratik Türk Birliyi
GADTB: Traxtur futbol klubunun Qərbi Azərbaycan vilayətinin Qoşaçay (Miyandoab) şəhərindən olan tərəfdarə Tohid Xadimi molla rejimin qüvvələri tərəfindən saxlanılıb.
Xadimin yaxınlarının verdiyi məlumata görə, o, 10 gündən artıqdır ki, təhlükəsizlik orqanları tərəfindən həbs edilib. Hazırkı ana qədər onun hansı ittihamla və harada saxlanıldığı barədə dəqiq məlumat yoxdur.
Məlumata əsasən, oktyabr ayının son günlərində Qərbi Azərbaycan vilayətində ən azı 20 başqa türk fəal da, kürd silahlı dəstələrinə bağlı şəxslərin açıq fəaliyyəti ilə bağlı tənqidi paylaşımlar etdiklərinə görə, saxlanılıb. Eyni zamanda, bir sıra türk fəalların təhlükəsizlik qurumları tərəfindən telefonla hədələndiyi və mövzu ilə bağlı paylaşımları davam etdirdikləri təqdirdə həbs olunacaqları bildirilib.
Milli-mədəni fəallara yaxın mənbələr qeyd edir ki, adıçəkilən kürd qrupları bölgədə SEPAH (İran İnqilab Keşikçiləri Korpusu) və İranın Kəşfiyyat Nazirliyinin dəstəyi ilə açıq fəaliyyət göstərirlər. Lakin bu durumu tənqid edən türk fəallar isə təzyiq, istintaqa çağırılma və həbslərlə üzləşirlər.
