GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, irqçi fars rejimin Güney Azərbaycan mədənlərini talaması ekoloji fəlakətə səbəb olub. Xüsusilə Əndərian qızıl mədənində baş verən ekoloji fəlakət əhalinin etirazlarından sonra araşdırılacaq.
Şərqi Azərbaycan Ədliyyəsinin ictimai işlər və cinayətlərin qarşısının alınması üzrə müavini Əhməd Müvəqqəri deyib ki, Vərziqanın Əndərian qızıl mədəninin ətraf mühiti çirkləndirməsi məsələsi diqqətlə araşdırılır:
«Ətraf kəndlərində mal-qaranın həlak olması ilə bağlı məsələ Ətraf Mühitin Mühafizəsi İdarəsinin müdiri və universitetin mütəxəssis qrupu ilə birlikdə araşdırılır. Bu qərar hələ də qüvvədədir».
Mədənə baxış keçirən Şərqi Azərbaycan Ətraf Mühitin Mühafizəsi İdarəsinin rəisi də bu məsələnin xüsusi əhəmiyyət kəsb etdiyini vurğulayaraq mədənin müvəqqəti bağlanması ilə bağlı verilən qərarın hələ də qüvvədə olduğunu vurğulayıb.
Qeyd edək ki, Əndərian Qızıl Mədəninin ətraf mühiti çirkləndirməsi problemi uzun illərdir davam edir. Rəsmi orqanlar, o cümlədən Ətraf Mühit İdarəsi bu barədə olan məlumatı ictimaiyyətdən gizlədərək problemin bu günkü həddə çatmasına səbəb olublar.
