Sayın Mikayil Oytanın Avstraliyada bəzi siyasətçilərin ayrıseçkilik siyasətinə etirazı Azərbaycan mətbuatında

GADTB-nin Mətbuat Mərkəzinə daxil olan məlumata görə,  sayın Mikayil Oytanın Avstraliyada bəzi siyasətçilərin ayrıseçkilik siyasətinə etirazı Azərbaycan mətbuatında da əks etdirilib. Azərtacda əks etdirilən materialı təqdim edirik:

Avstraliya azərbaycanlıları bəzi siyasətçilərin ayrı-seçkilik siyasətinə etiraz ediblər

Avstraliya-Azərbaycan Assosiasiyası (AAA) bu ölkənin bəzi siyasətçilərinin Azərbaycan icmasına qarşı ayrı-seçkilik siyasəti yürütməsinə etirazını bildirib.

Diasporla İş üzrə Dövlət Komitəsindən AZƏRTAC-a bildiriblər ki, bu barədə Assosiasiyanın sədri Mikayıl Oytanın ölkənin Yeni Cənubi Uels (NSW) inzibati ərazisinin millət vəkili və rabitə naziri Pol Fletçerə ünvanladığı məktubda söz açılıb.

Qeyd edilib ki, dövləti təmsil edən Pol Fletçerin də bu prosesdə fəal iştirak etməsi Azərbaycan icmasını kədərləndirir və məyus edir. Çünki bu, bir tərəfdən federal hökumətin mövqeyi və ölkənin multikultural dəyərləri ilə ziddiyyət təşkil edir, digər tərəfdən də Azərbaycan və erməni icmaları arasında gərginliyin yaşanması ilə nəticələnir.

Məktubda Ermənistanın 30 ilə yaxın müddət ərzində Azərbaycanın Qarabağ bölgəsini işğal etdiyi, azərbaycanlılara qarşı qanlı etnik təmizləmə siyasəti yürütdüyü, ötən illər ərzində Ermənistanın qanlı münaqişəsi səbəbindən Avstraliyaya miqrasiya edən azərbaycanlıların birtərəfli mövqe sərgiləyən bəzi yerli siyasətçilərin qızışdırıcı mövqeyi nəticəsində burada da rahatlıq tapa bilmədikləri diqqətə çatdırılıb.

Soydaşlarımız naziri və digər siyasətçiləri Avstraliyada etnik nifrət aşılayan təxribat xarakterli mövqedən əl çəkməyə çağırıb, doğma vətənləri hesab etdikləri Avstraliyada bütün icmalara multikultural ruhda yanaşılmasını tələb ediblər.