GADTB Güney Azərbaycan Demokratik Türk Birliyi
GADTB: İran Xarici İşlər Nazirliyinin sözçüsü İsmayıl Bəqayi cümə günü İranın Beynəlxalq Atom Enerjisi Agentliyi müfəttişlərini ölkəyə dəvət etməsi və nüvə obyektlərində yoxlamalara icazə verməsi ilə bağlı iddiaları rədd edib.
O bildirib ki, hərbi hücumlar nəticəsində Agentliyin çıxış imkanlarını itirdiyi obyektlərdə yoxlamaların bərpası danışıqların gedişindən və əldə olunacaq nəticələrdən asılı olacaq.
Bundan əvvəl ABŞ vitse-prezidenti Cey Di Vens son razılaşmadan sonra verdiyi müsahibədə Vaşinqton və Tehran arasında əldə olunmuş anlaşmaya əsasən BAEA müfəttişlərinin “mütləq şəkildə” İrana qayıdacağını bildirmişdi.
İsmayıl Bəqayi həmçinin yaxın günlərdə yeni bir görüşün keçirilməsi üçün hazırlıq işlərinin aparıldığını açıqlayıb.
İran və ABŞ nümayəndələri arasında İsveçrədə keçirilməsi planlaşdırılan görüş isə ləğv olunub. Sözçünün dediyinə görə, anlaşma mətninin 28 xordad tarixində rəqəmsal formada imzalanmasından sonra İsveçrədə ayrıca görüş keçirilməsinə təcili ehtiyac qalmayıb.
Bəqayi eyni zamanda Hörmüz boğazının bağlanması ilə bağlı yayılan məlumatları da əsassız adlandırıb və bildirib ki, bu marşrut üzrə gəmiçilik fəaliyyəti normal qaydada davam edir.
