GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, mayın 18-i günorta saatlarından başlayaraq Tehran şəhərinin “Azadi” stadionuna gedən yollarda Təbrizin “Traxtur” futbol klubunun tərəfdarlarıyürüş keçirirlər.
Yürüş bu gün yerli vaxtla saat 18:00-da Tehranın “İstiqlal” futbol komandası ilə Təbrizin “Traxtur” komandasının baş tutacaq qarşılaşmasına hazırlıqlarla bağlıdır.
Qruplar halında stadiona doğru gedən tərəfdarlar “Dağlar başı dumandır, Tehran Azərbaycandır”, “Hədəfimiz bir olsun, qartal qəhrəman olsun” şüarları səsləndirirlər.
Bununla yanaşı oyunun başlamasına saatlar qalmış “Azadi” stadionuna toplaşan azərbaycanlı tərəfdarlar “Azərbaycan var olsun, istəməyən kor olsun”, “Azadlıq, ədalət, milli hökumət” şüarları səsləndirirlər.
Qarşılaşmanı izləmək üçün Tehrana on minlərlə “Traxtur” azarkeşinin toplaşmasına baxmayaraq, 100 min nəfərlik stadiona cəmi 1500 nəfər “Traxtur”çunun buraxılacağı bildirilib. Hökumət məmurları və “İstiqlal” komandasının azarkeşləri azərbaycanlıların stadiona toplaşmalarına mane olublar. Məhz bundan sonra “Traxtur” azarkeşləri ilə “İstiqlal” azarkeşləri arasında qarşıdurma baş verib.
Toqquşma nəticəsində bir neçə nəfər yaralanıb və hadisə yerinə əlavə polis qüvvələri cəlb edilib.
