Tramp: İranın cavabının qəbul edilməyəcəyini və raket potensialının məhv ediləcəyini bildirdi

GADTB: ABŞ prezidenti Donald Tramp İranın münaqişəyə son qoymaq üçün təqdim etdiyi cavabın Vaşinqton tərəfindən qəbul edilməyəcəyinə şübhə ilə yanaşdığını bildirib.

Trampın sözlərinə görə, İran son 47 ildə həyata keçirdiyi siyasətə görə “kifayət qədər bədəl” ödəməyib və buna görə də Tehranın təqdim etdiyi şərtlər ABŞ üçün qəbuledilən hesab olunmur.

ABŞ prezidenti etiraf edib ki, danışıqlar istənilən nəticəni verməsə, hərbi əməliyyatların yenidən başlaması ehtimalı mövcuddur.

Bununla yanaşı, Tramp qeyd edib ki, əgər Vaşinqton üçün əlverişli şərtlərlə razılaşma əldə edilərsə, gələcəkdə Amerika neft şirkətləri İranda fəaliyyət göstərə bilər.

ABŞ Prezidenti Donald Tramp həmçinin İranın raket silahları sahəsində qorunub saxlanılan potensialını ləğv etmək niyyətində olduğunu bildirib.

Amerika lideri bunu Florida ştatının Vest Palm-Biç şəhərində jurnalistlərlə söhbətində deyib.

“Hə, mən bunu məhv etmək istərdim”, – deyə o, İranın raket texnologiyaları sahəsində hələ də mövcud olan istehsal gücləri haqqında suala cavabında bildirib.

Amerika administrasiyasının məlumatına görə, Birləşmiş Ştatlar və İsrail tərəfindən endirilən zərbələrdən sonra Tehranda raket potensialının 15 %-dən azı qalıb.

Jurnalistlər Trampa Vaşinqtonun İslam Respublikasına yenidən zərbə endirib-endirməyəcəyi barədə də sual veriblər. O isə deyib: “Baxarıq. Bu, mümkündür, belə bir şey, şübhəsiz ki, baş verə bilər”.