GADTB Güney Azərbaycan Demokratik Türk Birliyi
GADTB: ABŞ Prezidenti Donald Tramp Truth Social sosial şəbəkəsində paylaşdığı açıqlamada bildirib ki, ABŞ İrana qarşı hərbi əməliyyata başlamağa tam hazır idi. Onun sözlərinə görə, ölkənin hərbi hazırlıq səviyyəsi İkinci Dünya müharibəsindən bəri görünməmiş həddə çatmışdı. Lakin İranın və Yaxın Şərqdəki bəzi ölkələrin müraciətindən sonra hücumun icrası dayandırılıb.
Tramp bildirib ki, tərəflər “çərçivə razılaşması” üzərində ilkin razılığa gəliblər. Onun sözlərinə görə, bu razılaşma Hörmüz boğazının dərhal, tam və qeyd-şərtsiz açılmasını, eləcə də İranın nüvə təhlükəsinin aradan qaldırılmasını nəzərdə tutur.
ABŞ Prezidenti əlavə edib ki, bu müraciətləri və “dünya, eləcə də uğurlu və firavan İranın gələcəyi naminə” nəzərə alaraq, yekun razılaşmanın qısa müddətdə əldə olunacağı şərti ilə planlaşdırılan hücumu ləğv etmək qərarına gəlib.
Tramp həmçinin bildirib ki, İsrail də bu qərarı dəstəkləyib və bütün tərəfləri razılaşmanın yekunlaşdırılması üçün səylərini artırmağa çağırıb.
