GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, türk ölkələri Azərbaycan və Qırğızıstan 2022-ci ildə strateji tərəfdaşlıq haqqında bəyannamə imzalayacaqlar.
Bu barədə Qırğızstanın Azərbaycandakı səfiri Kayrat Osmonaliyev mətbuata açıqlamasında verib.
Onun sözlərinə görə, Azərbaycanla Qırğızıstan arasında münasibətlər daha yüksək strateji tərəfdaşlıq səviyyəsinə yüksəlir.
“Bundan əlavə, 2022-ci ildən bütün sahələrdə, xüsusən, təhsil və nəqliyyat sektorunda, birgə layihələrin hazırlanması və təsdiqi, investisiya fondunun yaradılması, Qırğızıstanda neft emalı zavodunun tikintisi və s. əməkdaşlığın intensivləşdirilməsi planlaşdırılır”, – səfir Osmonaliyev bildirib.
O, həmçinin, qeyd edib, gələn il iki ölkə arasında iqtisadi əməkdaşlıq sahəsində sənədlərin imzalanması gözlənilir.
“Gələn il Bakı ilə Bişkek arasında qardaşlaşma, eləcə də Çingiz Aytmatovun xatirəsinin əbədiləşdirilməsi haqqında sazişin imzalanacağı gözlənilir. Eyni zamanda, siyasi və diplomatik əlaqələrin möhkəmləndirilməsi, iqtisadi, mədəni və humanitar əlaqələri saxlanılması haqqında bəhs etmək olar. Bu mənada, humanitar sahədə qarşılıqlı mədəniyyət günlərinin keçirilməsi nəzərdə tutulur”, – Osmonaliyev vurğulayıb.
