GADTB Güney Azərbaycan Demokratik Türk Birliyi
Ukrayna müharibənin 195-ci günü üçün Rusiya ordusunun itkiləri haqda məlumatı yeniləyib.
Bu barədə Ukrayna Baş Qərargahı məlumat yayıb.
Bildirilib ki, Rusiya indiyə qədər 50150 hərbçi, 2077 ədəd tank, 4 484 ədəd zirehli döyüş maşını, 1 179 ədəd artilleriya sistemi, 296 ədəd RYAS (reaktiv yaylım atəş sistemi), 156 hava hücumundan müdafiə sistemi, 236 ədəd hərbi təyyarə, 207 ədəd helikopter, 3 305 ədəd avtomobil texnikası, 876 ədəd PUA, 209 qanadlı raket, 15 gəmi/qayıq, 109 xüsusi avadanlıq itirib.
Bu arada isə Ukrayna əsgərlərinin əks hücumunun rusların maddi-texniki imkanlarını zəiflətdiyi bildirilir. Onlar cənubda Rusiyanın canlı qüvvəsi və texnikası, komanda mərkəzləri və logistika mərkəzlərinə zərbələr endirib. Bu barədə ABŞ-ın Müharibənin Öyrənilməsi İnstitutu məlumat yayıb.
“Ukraynanın əks-hücum əməliyyatı Rusiyanın ölkənin cənubunda maddi-texniki və inzibati potensialını əhəmiyyətli dərəcədə pisləşdirir. Əks-hücum Rusiyanın işğal olunmuş ərazilərdə referendum keçirmək planlarının da qarşısını alıb. Bütün proseslər təhlükəsizlik səbəbindən dayandırılır. Ukrayna qoşunları Xerson vilayətində Rusiyanın taktiki və əməliyyat səviyyəsinin imkanlarını yavaş-yavaş azaltmaq niyyətindədir. Bu, çox güman ki, işğalçıların inzibati və bürokratik imkanlarına ciddi təsir göstərəcək”, – məlumatda deyilib.
