GADTB Güney Azərbaycan Demokratik Türk Birliyi
GADTB: Mərkəzi hökumətin illərlə davam edən yanlış siyasəti nəticəsində quruyan Urmiya gölü son yağıntılardan sonra qismən bərpa olunmağa başlayıb. Lakin suyun geri qayıtması ilə yanaşı, yeni bir problem də ortaya çıxıb – gölün sahillərində tullantıların yığılması.
Sosial şəbəkələrdə yayılan videolar göstərir ki, gölün qismən bərpasından sonra insanlar istirahət və üzgüçülük üçün sahillərə üz tuturlar. Lakin bəzi ziyarətçilər tullantılarını sahildə qoyaraq bu yeni bərpa olunan ekosistemdə geniş çirklənməyə səbəb olurlar.
Mütəxəssislər bu problemin bir hissəsini hökumətin məsuliyyətsizliyi ilə əlaqələndirirlər. Sahillərdə zibil qablarının olmaması və təmizlik xidmətlərinin fəaliyyət göstərməməsi məsul qurumların növbəti dəfə səmərəsiz fəaliyyətini üzə çıxarıb.
Mövcud vəziyyətə cavab olaraq Urmu gölünün ekoloji fəalları və təbiətsevərlər təşəbbüs göstəriblər. Onlar sahillərdə tullantıları toplamaqla yanaşı, ziyarətçilərə zibil torbaları paylayaraq gölün təmizliyinin qorunmasına töhfə verməyə çağırıblar. Dövlət idarəçiliyinin yetərsiz olduğu şəraitdə bu təşəbbüs vətəndaş cəmiyyətinin məsuliyyəti öz üzərinə götürdüyünü göstərir.
Urmu gölü təkcə bir su hövzəsi deyil, Azərbaycanın kimliyinin, tarixinin və təbiətinin ayrılmaz hissəsidir. Onun yenidən dirçəlməsi diqqətsizlik ucbatından itirilməməli olan mühüm bir fürsətdir. Bu mavi incinin qorunması bu gün hər zamankından daha çox Azərbaycan xalqının səyi və məsuliyyəti ilə bağlıdır.
