Xameneiyə bağlı “Keyhan” Azərbaycanın buludları oğurlaması barədə gülüc iddia irəli sürüb

Xameneiyə bağlı “Keyhan” qəzeti gülünc iddia ilə yazıb ki, Türkiyədən gələn buludlar Bakıya doğru hərəkət edir. Molla rejimi su qıtlığına səbəb olan yarıtmaz siyasəti üçün Türkiyə və Azərbaycanı günahlandırıb.

İranın ali rəhbərinə birbaşa tabe olan radikal mühafizəkar “Keyhan” qəzeti gülünc iddia ilə yazıb ki, peyk görüntülərinə əsaslanaraq iddia olunur ki, əvvəllər Aralıq dənizindən Türkiyə üzərindən İrana daxil olan bulud kütlələri bu günlərdə “İran sərhədlərinə çatmadan birbaşa Bakıya doğru istiqamətlənir”.

Məqalədə buludların istiqamət dəyişikliyinin arxasında “düşmənlərin iqlim müdaxiləsi” ehtimalı irəli sürülür. Qəzetdə, xüsusilə Türkiyədə fəaliyyət göstərən 75 İsrail şirkətinə toxunularaq bu prosesin “iqlim dəyişikliyi layihəsi” adı altında aparıldığı iddia edilir.

Bütün bu iddialar isə elmi əsaslardan çox, sırf siyasi təbliğat ritorikasına bənzəyir. Hazırda dünyanın heç bir nüfuzlu meteoroloji qurumu və ya elmi mərkəzi bu cür “buludların yönünün süni yolla dəyişdirilməsi” ilə bağlı faktlara əsaslanan açıqlama verməyib.