GADTB Güney Azərbaycan Demokratik Türk Birliyi
GADTEB: Qərbi Azərbaycanın Xoy bölgəsinə aid Siyabaz kəndinin bir qrup sakini kənd ərazisində günəş paneli sahəsinin tikintisi üçün seçilən yerə etiraz edib.
Etirazçı kəndlilər yayımladıqları birgə açıqlamada bildiriblər ki, layihə üçün seçilən ərazi ciddi problemlərlə müşayiət olunur. Onların sözlərinə görə, müəyyən edilən məkan kəndlilərə məxsus əkin sahələrinin mühafizə zonasına düşür və həmin yol kənd sakinlərinin əsas təsərrüfat yoludur. Bundan əlavə, etirazçılar qeyd ediblər ki, bu addım İran İslam Respublikasının Konstitusiyasının 31-ci maddəsinin 4-cü bəndinə ziddir.
Məlumata görə, layihənin planlaşdırıldığı torpaq sahəsi kəndin ənənəvi taxıl döyüm (xırman) yeri hesab olunur və yerli sakinlər bu sahədən buğda biçini zamanı istifadə edirlər. Eyni zamanda, həmin yol mal-qaranın otlaq və tövlələrə hərəkəti üçün əsas keçid yoludur və layihənin icrası kənddə heyvandarlıq fəaliyyətinə ciddi maneə yarada bilər.
Siyabaz kəndinin sakinləri yerli rəsmilərə müraciət edərək layihənin yer seçiminə yenidən baxılmasını və əhali ilə məsləhətləşmə aparılmasını tələb ediblər ki, kəndlilərin əkinçilik və heyvandarlıq hüquqları pozulmasın.
Qeyd edək ki, bu, Siyabaz kəndində ilk etiraz deyil. Bir müddət əvvəl kənd sakinləri “Ahək Fərəvər Mehr Taban” şirkətinə məxsus dəmir mədəni fəaliyyətinin ekoloji fəsadlarına qarşı da aksiya keçirmişdilər.
