GADTB Güney Azərbaycan Demokratik Türk Birliyi
GADTB: Azərbaycanın energetika naziri Pərviz Şahbazov Azərbaycan-Türkiyə 5-ci Enerji Forumunda çıxışı zamanı bildirib Zəngəzur dəhlizi vasitəsilə Azərbaycan və Türkiyə arasında yeni elektrik bağlantısının yaradılması nəzərdə tutulur.
O qeyd edib ki, rəqəmsallaşma, süni intellekt, data mərkəzlərinin inkişafı və elektrikləşmənin genişlənməsi enerji sistemləri qarşısında yeni tələblər yaradır. Bu isə yeni generasiya gücləri ilə yanaşı, daha güclü şəbəkələr, enerji saxlanc sistemləri və ölkələri birləşdirən yeni elektrik bağlantıları tələb edir.
Nazirin sözlərinə görə, Azərbaycan və Türkiyənin neft-qaz layihələri ilə Şərq və Qərb arasında yaratdığı enerji bağlantılarının elektrik enerjisi və yaşıl enerji dəhlizləri ilə genişləndirilməsi nəzərdə tutulur. Məqsəd Xəzərin və Mərkəzi Asiyanın “yaşıl enerjisi”nin Azərbaycan və Türkiyə üzərindən Avropaya çatdırılmasıdır.
Pərviz Şahbazov bildirib ki, Naxçıvanın Zəngəzur dəhlizi vasitəsilə Azərbaycanın vahid elektrik enerjisi sisteminə qoşulması da bu yanaşmanın tərkib hissəsidir. “Bu istiqamətdə Cəbrayılda enerji infrastrukturu yaradılıb. Növbəti mərhələdə Zəngəzur dəhlizi vasitəsilə Naxçıvan və Türkiyə ilə elektrik bağlantısının yaradılması nəzərdə tutulur. Beləliklə, söhbət Azərbaycan və Türkiyə arasında yeni elektrik xəttindən gedir”, – nazir deyib.
O əlavə edib ki, layihə Xəzərin hər iki sahilində yerləşən Türk dövlətlərinin enerji sistemlərinin əlaqələndirilməsinə də imkan verəcək.
