Əli Acorlu “müharibə aparma” ittihamı ilə edam təhlükəsi ilə qarşılaşıb

GADTB: Qəzvinin Əlvənd şəhərindən olan 35 yaşlı azərbaycanlı gənc Əli Acorlu ciddi edam təhlükəsi ilə üzləşib. Bir uşaq atası olan Əli Acorlu “Əli Məşti” adlı dondurma mağazasının sahibidir. O, bacısı oğlu Məhəmmədhüseyn Xələcin yanvar etirazları zamanı öldürülməsindən sonra saxlanılıb.

Məlumatlara görə, Məhəmmədhüseyn Xələc yanvarın 18-də Əli Acorlunun dondurma mağazasının qarşısında təhlükəsizlik qüvvələrinin açdığı atəş nəticəsində həyatını itirib. Hadisədən sonra təhlükəsizlik qüvvələri Əli Acorlunu saxlayıb və onun iş yerini möhürləyiblər.

Yayılan xəbərlərdə bildirilir ki, o, hazırda Qəzvinin Çubindər həbsxanasında tam məlumat qadağası şəraitində saxlanılır və ailəsi ilə görüş, eləcə də normal əlaqə imkanından məhrum edilib.

Ailəyə yaxın mənbələrin sözlərinə görə, işə baxan hakim “müharibə aparma” ittihamına əsaslanaraq onun barəsində ağır hökm çıxarıb və ailəsi edam hökmünün icra olunacağı ehtimalından ciddi narahatlıq keçirir.