GADTB Güney Azərbaycan Demokratik Türk Birliyi
GADTB: Traxtur futbol klubu İran Futbol Federasiyasından FİFA-ya rəsmi şikayət ünvanlayıb. FİFA-nın baş katibinə göndərilən məktub klubun idarə heyətinin imzası və Traxturun sahibinin razılığı ilə təqdim edilib. Məktubda bu addımın məqsədinin İran futbolunu zəiflətmək deyil, rəqabət ədalətini qorumaq və ayrı-seçkiliyə qarşı mübarizə aparmaq olduğu vurğulanıb.
Şikayət üç əsas istiqamət üzrə qaldırılıb və klub İran futbolunda intizam və idarəetmə proseslərinin FİFA tərəfindən müstəqil şəkildə araşdırılmasını istəyib.
Birinci istiqamətdə Traxtur Azərbaycan İran Kubokunda Şəms-Azər Qəzvinlə oyun öncəsi təxirəsalma tələbini xatırladıb. Klubun iddiasına görə, Xorvatiya səfirliyinin komandanın əcnəbi üzvləri üçün verdiyi təhlükəsizlik tövsiyələrinə baxmayaraq, fors-major şərtləri nəzərə alınmayıb. Digər bəzi qarşılaşmaların təxirə salındığı halda bu müraciətin rədd edildiyi, həmçinin qərarın gec açıqlanması səbəbilə effektiv etiraz imkanının aradan qalxdığı bildirilib.
İkinci istiqamətdə klub oyunlar zamanı komanda və futbolçulara qarşı etnik və irqi şüarların davam etməsinə etiraz edib. Bildirilib ki, mövcud sübutlara baxmayaraq, çəkindirici tədbirlər görülməyib. Məktubda federasiyanın əvvəlki qərarına – irqi davranışlar təkrarlanarsa 3:0 hesablı texniki məğlubiyyət verilməsi qaydasına – istinad edilib və Məlavan–Traxtur oyununda şüarların təkrarlandığı halda bu qaydanın tətbiq edilmədiyi qeyd olunub. Klub bunu “anti-irqçilik qaydalarının natamam icrası” və ikili standart kimi dəyərləndirib və FİFA-dan araşdırma tələb edib.
Üçüncü istiqamətdə isə hakimlik və VAR protokolunun natamam tətbiqi gündəmə gətirilib. Video köməkçi hakimdən istifadə edilmədən verilən qərarlar, eləcə də VAR hakimlərinin seçimi ilə bağlı narahatlıqlar ifadə olunub.
Beş səhifəlik məktub sübutlar və fotoşəkillərlə birlikdə FİFA-ya təqdim edilib. Klub bildirir ki, iş yekun nəticə əldə edilənədək izləniləcək.
